Նախկին վարչապետ Հրանտ Բագրատյանի համոզմամբ, Հունգարիայի հետ դիվանագիտական կապերը խզելու որոշումը հիմար քայլ էր: «Ամենահիմար քայլն էր, որովհետեւ հարաբերությունների խզումը այս պահին թույլ չի տա մինչեւ վերջ իմանանք՝ ինչ էր կատարվում: Հօգուտ նրանց քայլ կատարեց, կարճամիտ , գուցե տղայական, իսկ գուցե դիտմամբ»,- կարծիք հայտնեց պարոն Բագրատյանը՝ այսօր Ազատության հրապարակում իր համախոհների հետ հերթական հանդիպման ժամանակ:
Նրա կարծիքով, Հայաստանի իշխանություններն առաջիկա օրերին կփորձեն «մի երկու էժան ռեզերվային քայլ անել» տեղի ունեցածի կապակցությամբ եւ միավորներ հավաքել. « Մի քանի օր հետո մոռացվելու է ու գնա… սա մասնավոր հարց է, իսկ իշխանություններն այս մասնավոր հարցը կդարձնեն համազգային խնդիր: Արտգործնախարարը ե՞րբ է աշխատել, նրան ով վաղուց գիտի՝ շփվելով, նա անաշխատունակ մարդ է, մենակ սիրուն ուտեն իրենց ուզած ռեստորաններում՝ պետության հաշվին»:
Պարոն Բագրատյանը վստահ է, որ Ադրբեջանի նախագահը Հունգարիայում կոնկրետ մարդկանց կաշառք է տվել. «Հիմա Քեթրին Էշփոնը մեզ պետք է եվրոպական կարգ ու կանոն սովորեցնի՞, թող գնա քննություն կազմակերպի՝ Ալիեւն ում է փողը տվել… Սա Եվրամիության գործն էլ է: Հայաստանը Հունգարիայի աչքի թայը պիտի հանի»:
Արփինե ՍԻՄՈՆՅԱՆ
