Հունգարացի հայագետ Ժիգմունդ Բենեդեկտը քիչ առաջ Հայաստանի արտաքին գործերի նախարարության դիմաց բողոքի ակցիայի ժամանակ ներողություն խնդրեց` Գուրգեն Մարգարյանին կացնահարած ադրբեջանցի Ռամիլ Սաֆարովին Ադրբեջանին արտահանձնելու Հունգարիայի որոշման համար: «Իմ անունից հայ ժողովրդից ու Գուրգեն Մարգարյանի հարազատներից ներողություն եմ խնդրում երեկվա ինձ համար անընդունելի ու անբարոյական արարքի համար: Այն, ինչ երեկ Հունգարիայի կաավարությունն արել է, իմ կարծիքով հակասում է բարոյական ու համամարդկային արժեքներին: Չեմ կարող համաձայնել Հունգարիայի այդ արարքին, որովհետեւ այն մարդասպանությունը, որը կատարվել է 8 տարի առաջ՝ ամենադաժան ձեւով է արվել, ու Գուրգեն Մարգարյանը մահացել է միայն նրա համար, որ ինքը հայ է: Սա ամբողջ մարդկության դեմ կատարած հանցագործություն է: Այսպիսի մարդուն արտահանձնել Արդրբեջանին Հունգարիայի վերջին 20 տարվա դիվանագիտության պատմության մեծագույն սխալ եմ համարում»:
Պարոն Բենեդեկտը կիսեց պաշտոնական Երեւանի տեսակետը, որ մարդասպանին Ադրբեջանին հանձնելով Հունգարիան գործարքի է գնացել Ադրբեջանի հետ. «Կարծում եմ` այո, այդպես է եղել, ու եթե եղել է հավանական գործարքի վարկածը, դա համարում եմ շատ անբարոյական, որովհետեւ ինչպես հայտնի է՝ Ադրբեջանը Հունգարիայի համար կարեւոր առեւտրային գործընկեր է, բայց առեւտրային գործընկերությունը չպետք է գերազանցի համամարդկային արժեքներին»:
Հիշեցնենք, որ «Հայազն» միությունն այսօր բողոքի ակցիա է կազմակերպել ԱԳՆ-ի դիմաց, այնտեղից ցուցարարները երթով շարժվեցին դեպի Հունգարիայի հյուպատոսարան:
Կարդացեք նաև
Մանրամասները տեսանյութում
Արփինե ՍԻՄՈՆՅԱՆ
