Այսօր Գյումրիում ծեծի ու կրակոցների գործում որպես մեղադրյալներ ներգրավվել են Կարապետ Գարայանը և Արտաշես Պողոսյանը, նրանց նկատմամբ որպես խափանման միջոց է ընտրվել կալանավորումը, հայտարարվել է հետախուզում: Ինչպես «Փաստինֆո» գործակալությանը հայտնեց ՀՀ գլխավոր դատախազի մամուլի քարտուղար Սոնա Տռուզյանը, առաջինին մեղադրանք է առաջադրվել ՀՀ քրեական օրենսգրքի 258-րդ հոդվածի 4-րդ և 235-րդ հոդվածի առաջին մասերով՝ Զենքի կամ որպես զենք օգտագործվող առարկաների գործադրմամբ կատարված խուլիգանություն և Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը, իսկ երկրորդին՝ քրեական օրենսգրքի 258-րդ հոդվածի 3-րդ մասով:
Նույն օրը ավելի վաղ ձերբակալված Հարություն Համբարյանի նկատմամբ խափանման միջոց է ընտրվել կալանավորումը, նրա դեմ մեղադրանք է առաջադրվել 258 հոդվածի 3-րդ մասով: Իսկ նախօրեին ձերբակալվել էր Պատվական Մադոյանը՝ 258 հոդվածի 3-րդ մասով նախատեսված հանցագործություն կատարելու կասկածանքով:
Հիշեցնենք, որ օգոստոսի 29-ին Գյումրու քաղաքապետ Վարդան Ղուկասյանի որդու՝ Սպարտակ Ղուկասյանի, դեմ մեղադրանք էր առաջադրվել քրեական օրենսգրքի 258 հոդվածի 4-րդ և 235 հոդվածի առաջին մասերով, խափանման միջոց էր ընտրվել կալանավորումը և հայտարարվել հետախուզում:
«Փաստինֆո»
