«Samsung»-ը ողջունել է Տոկիոյի շրջանային դատարանի կոմից «Apple»-ի հայցի մերժումը
«Apple» ընկերությունը պարտություն է կրել հարավկորեական մրցակից «Samsung» ընկերության դեմ ամբողջ աշխարհում վարվող իրավական պայքարում:
Ճապոնիայի դատարաններից մեկի կողմից ուրբաթ օրը կայացված որոշման համաձայն, «Samsung»-ն իր «Galaxy» սմարթֆոնների և պլանշետային համակարգիչների արտադրության մեջ օգտագործվող տեխնոլոգիաները չեն գողացվել «Apple»-ից:
«Samsung»-ը ողջունել է Տոկիոյի շրջանային դատարանի կոմից «Apple»-ի հայցի մերժումը՝ ասելով, որ այն հաստատում է ընկերության կողմից արդեն երկար ժամանա զբաղեցվող դիրքորոշումը, որի համաձայն իր կողմից արտադրվող սարքերը չեն խախտում «Apple»-ի տեխնոլոգիական սեփականությունը:
«Apple»-ը սակայն դեռևս որևէ արձագանք չի ներկայացրել Ճապոնիայի դատարանի այս որոշման կապակցությամբ:
Հիշեցնենք, որ մեկ շաբաթ առաջ Միացյալ Նահանգների Կալիֆորնիա նահանգի դատարանում «Apple» ընկերությունը շահել է դատական գործը: Դատարանի ընդունված որոշման համաձայն, «Samsung»-ը պետք է մեկ միլիարդ դոլարի վնաս փոխհատուցի «Apple»-ին:
Հարավային Կորեայի դատարանն ավելի վաղ որոշում էր կայացրել այն մասին, որ «Apple»-ն ու «Samsung» ընկերությունները խախտել են շարժական սարքերի միմյանց արտոնագրերը:
Սեուլի դատարանի կողմից կայացված որոշման համաձայն, «Apple»-ը խախտել է «Samsung» ընկերության անլար կապին վերաբերող երկու արտոնագիրը, իսկ «Samsung»-ը խախտել է «Apple»-ի դիզայնի արտոնագրերից մեկը:
Դատարանը որոշման համաձայն, երկու կողմերը չնչին վնաս են հասցրել միմյանց և սահմանափակ արգելք էր դրել Հարավային Կորեայում ընկերություններից յուրաքանչյուրի արտադրանքի վաճառքի վրա:
Որոշման մեջ մասնավորապես նշվել էր, որ աշխարհում շարժական հեռախոսների ներկայիս ամենամեծ արտադրող «Samsung»-ը չի պատճենել «Apple»-ի կողմից արտադրվող՝ մեծ պահանջարկ վայելող «iPhone» սարքի դիզայնը:
Դատական այս գործը տեխնոլոգիական երկու գերհսկա ընկերությունների միջև գլոբալ մակարդակով շարունակվող իրավական պայքարի մասերից մեկն է, որի արդյունքները միլիարդավոր դոլարներ կազմող հետևանքներ կունենան երկու ընկերությունների համար:
Արմեն Հովհաննիսյան
«Ամերիկայի Ձայն»
