ՀԱԿ ազատազրկման դատապարտված ակտիվիստներին ազատ արձակելու պահանջով քիչ առաջ դատախազության շենքի դիմաց ավարտվեց բողոքի ակցիան:
«Ազատ արձակել մոտ 1 տարի բանտում գտնվող Տիգրան Առաքելյանին, արդարացնել երիտասարդներին, որոնք կամակատար դատարանի կողմից դատապարտվեցին մինչեւ 6 տարի ազատազրկման եւ հարուցել քրեական գործ, որով պատժի կենթարկվեն բոլոր այն մեղավորները, գործը փորձել կոծկողները, ինչպես նաեւ փաստաբանների ու երիտասարդների նկատմամբ օգոստոսի 9-ին բազմաթիվ ապօրինություններ գործած իրավապահ մարմինների ներկայացուցիչները»,- իրենց պահանջներից առանձնացրեց ՀԱԿ ակտիվիստ Արեգ Գեւորգյանը:
Ակտիվիստ Զարուհի Հովհաննիսյանն էլ գործով դատարանի թույլ տված խախտումները թվարկեց: Ըստ նրա, դատավոր Գագիկ Պողոսյանը խորհրդատվական սենյակ անցնելուց առաջ ամբաստանյալ Սարգիս Գեւորգյանին հնարավորություն չի տվել ավարտել իր պաշտպանական ճառը ու հանդես գալ իր վերջին խոսքով, իսկ մեղադրական եզրակացությունը դատարանում միայն ոստիկանների ցուցմունքի հիման վրա է հիմնվել ու անտեսվել են ՀԱԿ ակտիվիստների բոլոր ցուցմունքները:
Զ. Հովհաննիսյանի խոսքերով, դեպքի մանրամասները պատմող վկաներից մեկն էլ դատարանի դահլիճում հայտարարել է, որ ոստիկանները տարբեր գործերով իրեն դատարան են բերում, որ արտահայտի նրանց տեսակետն ու ցանկությունը եւ իրեն դատարանի դահլիճ բերելուց առաջ էլ ծեծի են ենթարկել:
Կարդացեք նաև
Արփինե ՍԻՄՈՆՅԱՆ
