Այսօր ԿԸՀ նախագահ Տիգրան Մուկուչյանը նշեց, որ հաշվի առնելով մամուլում տեղ գտած հրապարակումները՝ ուզում է անդրադառնալ Կապանի դեպքին. «Կապանում տեղամասային ընտրական հանձնաժողովներում ՀԱԿ անդամներով համալրելով հարցը բավականին շատ է քննարկման առարկա դարձել: Կային հրապարակումներ, որ ՀԱԿ անդամներով համալրվել են ՏԸՀ-ի փոխնախագահները: Վաղուց ՏԸՀ-ում փոխնախագահի կամ տեղակալի պաշտոն գոյություն չունի: Բոլոր 21 տեղամասերում ներկայացվել են թեկնածուներ, այդ թեկնածուներից որեւէ մեկը բացարկ, դիմում չի ներկայացրել՝ հանձնաժողովի կազմից դուրս գալու համար, իսկ թե ովքեր որ կուսակցության անդամ են՝ ԿԸՀ -ն չի ուսումնասիրում: Նշվում է անուն-ազգանուն-հայրանունը: Բոլոր տեղերում սահմանված կարգով թեկնածուներ առաջադրված եղել են»:
Ինչ վերաբերում է Կապանի քաղաքապետի՝ Արտուր Աթայանի ինքնաբացարկին եւ Ախթալայի դեպքերին, հարցին՝ չե՞ք կարծում, որ այդ նախընտրական միջադեպերը կարող են անդրադառնալ ընտրությունների ընթացքի վրա՝ պարոն Մուկուչյանը պատասխանեց. «Չնայած փորձ է արվում ներկայացնել, թե Կապանի քաղաքապետի ինքնաբացարկի հայտարարությունը ինչ-ինչ նկատառումներով է իրականացվել, բայց օրենքը ասում է, որ պետք է սահմանված կարգով ներկայացվի դիմում իրավապահ մարմիններին, ոչ թե տարածվի քաղաքական հայտարարություն: Եթե թեկնածուներն ուզում են արդար ընտրություններ լինեն, պետք է յուրաքանչյուրի քաղաքացի օգտվի օրենքով ընձեռնված իր իրավունքներից»:
Ախթալայի դեպքի հետ կապված նա ասաց, որ յուրաքանչյուր դեպք պետք է մանրակրկիտ քննություն ստանա, եւ «ես չեմ կարծում, որ այս դեպքերը կարող են որեւէ կերպ ստվերել ընտրությունների ընթացքը»:
Հռիփսիմե ՋԵԲԵՋՅԱՆ
Կարդացեք նաև
