Ընդդիմությունը պետք է վերադարձնի «Ժառանգության» պարտքը

       -Արտասահմանում գտնվող ՀՀ քաղաքացիների ընտրական իրավունքը վերականգնելու վերաբերյալ «Ժառանգության» օրենսդրական նախաձեռնությունը միանշանակ չընդունվեց քաղաքական եւ լրատվական շրջանակներում։ Ինչո՞ւ առաջացավ նման նախաձեռնության անհրաժեշտությունը։

   -Սահմանադրության համաձայն, Հայաստանի յուրաքանչյուր քաղաքացի ունի ընտրելու իրավունք։ Ընդհանրապես խտրականությունը, երկակի ստանդարտների կիրառումը անընդունելի է ցանկացած պարագայում եւ ցանկացած ոլորտում։ Այս դեպքում գործ ունենք հենց երկակի ստանդարտների, խտրականության հետ։

   Ինչո՞ւ դեսպանատների եւ հյուպատոսությունների աշխատողները, արտերկրում գրանցված ընկերությունների աշխատակիցները այնտեղ բացված ընտրատեղամասերում կամ էլեկտրոնային քվեարկության տարբերակով կարող են մասնակցել ընտրություններին, իսկ «շարքային» քաղաքացիները, որոնք այս կամ այն պատճառով գտնվում են Հայաստանի սահմաններից դուրս, չեն կարող։ Այս մոտեցումն առնվազն անտրամաբանական է։

   -Ընտրական օրենսգրքի քննարկումների ժամանակ այդ հարցը բազմիցս արծարծվել է, բայց չի արժանացել կոալիցիայի հավանությանը։ Կարծում եք՝ քաղաքական մեծամասնությունը փոխե՞լ է իր կարծիքը։

   -Չգիտեմ՝ մեծամասնության դիրքորոշումը փոխվե՞լ է, թե՞ ոչ, բայց, այնուամենայնիվ, որոշումներ ընդունողներն այն ժամանակ մի փոքր այլ կազմով էին հանդես գալիս, հիմա՝ մի փոքր այլ, եւ չի բացառվում, որ մոտեցումներն էլ տարբեր լինեն։

   Ամեն դեպքում, այստեղ կա սահմանադրականության խնդիր, ուրեմն, պետք է հարգենք սահմանադրությունը եւ առանց որեւէ խտրականության ապահովենք մեր բոլոր քաղաքացիների ընտրելու իրավունքը, առավել եւս, որ դրա տեխնիկական հնարավորությունները կան. դեսպանատներում բացվող տեղամասերը լիովին ընձեռում են այդ հնարավորությունը։

   -«Ազատ դեմոկրատների» փոխնախագահը մտավախություն է հայտնել, որ դա մեծացնում է ձայների հավելագրման ռիսկերը։ Կարո՞ղ է այնպես ստացվել, որ «Ժառանգություն» խմբակցության անդամները չաջակցեն ձեր իսկ հեղինակած նախագծին։

   -Չեմ կարող խոսել խմբակցության անունից, որովհետեւ խմբակցության անդամ չեմ, բայց ցանկացած պարագայում, հասկանալով Անուշ Սեդրակյանի նկատառումները, այդ մտահոգությունը չափազանցված եմ համարում։

   -Կողքից նայելիս տպավորություն է ստեղծվում, թե «Ժառանգությունը» եւ «Ազատ դեմոկրատները» տարանջատ են գործում, չնայած միասնական ցուցակով են անցել խորհրդարան։

   -Չգիտեմ՝ կողքից ինչպե՞ս է «նայվում», բայց խորհրդարանական ընտրություններից շատ ժամանակ չի անցել. ընդամենը եղել է ընտրություն, գումարվել է Ազգային ժողովի մի քանի նիստ ղեկավար մարմինների ընտրության եւ կառավարության ծրագրի հաստատման օրակարգով, եւ այս պահին խոսել սինխրոն կամ ոչ սինխրոն գործողությունների մասին, կարծում եմ, դեռ վաղ է։ Ժամանակը ցույց կտա՝ խմբակցության գործունեությունը որքանով ներդաշնակ է, որքանո՞վ արդյունավետ։

   Համենայն դեպս, մինչեւ հիմա մեր եւ «Ազատ դեմոկրատների» միջեւ որեւէ խնդիր կարծես թե չի եղել, որովհետեւ հրապարակային գործունեության մեծ դաշտ էլ չի եղել։

ԼԻԼԻԹ ՊՈՂՈՍՅԱՆ

«Հայոց աշխարհ»