Ռումինիայում ընթացող ծանրամարտի Եվրոպայի մինչեւ 17 տարեկան տղաների եւ աղջիկների 10-րդ առաջնությունում մինչեւ այսօր Հայաստանից մրցահարթակ մտած երեք ծանրորդները՝ Գեւորգ Սարիբեկյանը, Իզաբելա Յայլյանը եւ Ժորժ Եղիկյանը, ընդհանուր առմամբ նվաճել են ութ մեդալ, այդ թվում՝ 2 մեծ ոսկե, 1 մեծ արծաթե, 3 փոքր ոսկե եւ 2 փոքր արծաթե:
Ակնկալվում է, որ այսօր մեդալների թիվը կավելանա: Ցերեկը պայքարի մեջ ներգրավվելու է 69 կգ քաշային Վարդան Միլիտոսյանը: Գյումրեցին նախապես հայտավորել է երկամարտի 300 կգ, որը հինգ կգ-ով ավելի է ադրբեջանցի Էլխան Ալիգուլիզադայի նախնական պատվերից, իսկ ավելի ուշ՝ 77 կգ քաշային Անդրանիկ Կարապետյանը, որի նախնական 310 կիլոգրամը 10-ով բարձր է մոտակա միցակցի՝ ռուսաստանցի Արտյոմ Լեֆլերի պատվերից:
Այսօր եւս մի ծանրորդ է մտնելու մրցահարթակ՝ Ռուսաստանի դրոշի ներքո հանդես եկող Անի Սարգսյանը (63 կգ քաշային կարգ), որն առնվազն արծաթե մեդալ նվաճելու լավ հնարավորություններ ունի:
Աշոտ ՀԱԿՈԲՅԱՆ
