Դատախազությունը մերժել է Հայ ազգային կոնգրեսի երիտասարդ երեք ակտիվիստների վերաբերյալ քրեական գործի կարճման հիմքերի դեմ փաստաբան Հովիկ Արսենյանի բողոքը։ Օգոստոսի 4-ին ակտիվիստներ Արեգ Գեւորգյանը, Վահագն Գեւորգյանը եւ Սահակ Մուրադյանը Հատուկ քննչական ծառայությունից որոշում էին ստացել, համաձայն որի՝ կարճվել է իրենց նկատմամբ հարուցված քրեական գործը՝ ապացույցների բացակայության հիմքով։ Կարճման որոշումը ստանալուց հետո երիտասարդների փաստաբան Հովիկ Արսենյանը բողոք էր ներկայացրել՝ նշելով, որ երեք երիտասարդների մասով քրեական գործի կարճման հիմքը պետք է լինի ոչ թե ապացույցների, այլ հանցակազմի բացակայությունը, այսինքն՝ իրենք ոչ թե հանցագործություն են կատարել, որը ոստիկանները չեն կարողացել ապացուցել, այլ՝ որեւէ հանցագործություն չեն կատարել։
Գործը վերաբերում էր անցած տարվա օգոստոսի 9-ին Կարապի լճի մոտ տեղի ունեցած միջադեպին, որի հետեւանքով ձերբակալվել էին Հայ ազգային կոնգրեսի յոթ ակտիվիստներ, իսկ նրանցից չորսին՝ Տիգրան Առաքելյանին, Արտակ Կարապետյանին, Սարգիս Գեւորգյանին եւ Դավիթ Քիրամիջյանին դատարանը հուլիսի 20-ին դատապարտել է 2- 6 տարվա ազատազրկման։ Գործի կարճման վերաբերյալ երեք երիտասարդները բողոքում էին նաեւ այն պատճառով, որ այն նույն ցուցմունքները եւ կեղծ ապացույցները, որոնցով 2-6 տարվա ազատազրկման են դատապարտվել իրենց չորս ընկերները, կան նաեւ իրենց դեմ, սակայն այս դեպքում որոշում է կայացվել գործը կարճել, ինչը ապացուցում է քրեական գործերի կեղծ լինելը։
Կարճված գործով անցնող երիտասարդներից Արեգ Գեւորգյանի խոսքով՝ նույն դրվագը, նույն գործողությունը մի դեպքում մեկնաբանվում է որպես հանցագործություն, մյուս դեպքում՝ ոչ. «Այստեղ իրավական առումով որեւէ տրամաբանություն չկա իրավապահ մարմինների, էս դեպքում՝ ՀՔԾ-ի գործողությունների մեջ։ Սա մեզ մտորումների տեղիք է տալիս եւ ստիպում է մեզ եւս մեկ անգամ համոզվել, որ սա քաղաքական հաշվեհարդարի յուրատեսակ մի ձեւ է»:
«Հայկական ժամանակ»
