Փաստաբան Արթուր Գրիգորյանն ընդդեմ ՀՀ նախկին վարչապետ Հրանտ Բագրատյանի գործը եւս մոտենում է հանգուցալուծման։ Սեպտեմբերի 12-ին դատարանը կհրապարակի գործով վճիռը։ Հիշեցնենք, որ Արթուր Գրիգորյանը հայց է ներկայացրել Բագրատյանի դեմ՝ իրեն վիրավորելու եւ զրպարտելու հիմքով։ Բագրատյանը մեր թերթին տված հարցազրույցում դժգոհել էր Արթուր Գրիգորյանի մատուցած ծառայություններից։
Նախնական դատական նիստերի ժամանակ Արթուր Գրիգորյանը Բագրատյանի պաշտպան, փաստաբան Վահե Հովսեփյանին եւս ներգրավել էր որպես պատասխանող։ Իբր պաշտպանն է Բագրատյանին դրդել վարկաբեկել իրեն։ Վերջինս դատարանին միջնորդել էր կիրառել իր սիրելի հայցի ապահովման միջոցը՝ արգելանք դնել Վահե Հովսեփյանի գույքի եւ դրամական միջոցների վրա, սակայն դատարանը չէր բավարարել միջնորդությունը։ Գրիգորյանը համապարտության սկզբունքով մեկուկես միլիոն դրամ Հրանտ Բագրատյանից է պահանջում, մեկուկես միլիոն՝ նրա փաստաբանից։ Վահե Հովսեփյանը Գրիգորյանի ներկայացրած դիմումի վերաբերյալ, որպես պատասխանող եւ որպես Բագրատյանի ներկայացուցիչ, ներկայացրել է իր դիրքորոշումը՝ հիմնավորելով, որ Արթուր Գրիգորյանի եւ հայցը, եւ հայցի լրացումն անհիմն են, ինչին, ի դեպ, հայցվոր կողմը որեւէ առարկություն չի ներկայացրել։
Օգոստոսի 28-ին կայացած դատական նիստում, որին ոչ Արթուր Գրիգորյանը, ոչ իր պաշտպանը չեն մասնակցել, դատարանն արդեն անցել է դատաքննության փուլ, ապա գործի քննությունը համարել ավարտված եւ նշանակել վճռի հրապարակման օրը:
Կարդացեք նաև
Սոնա ՀԱՐՈՒԹՅՈՒՆՅԱՆ
«Հրապարակ»
