«…Բյուջեն կատարվում է սահուն կերպով, բյուջեի եկամուտների հարկային հատվածը նույնպես ընթանում է ըստ ծրագրածի, ինչը ենթադրում է, որ հարկային եկամուտների թերակատարման մասին խոսակցությունները չեն համապատասխանում իրականությանը»,-ասված է Ֆինանսների նախարարության Aravot.am-ին այսօր ուղարկած հաղորդագրության մեջ: Ըստ նույն աղբյուրի, հարկային եկամուտները կատարվել են համապատասխան ծրագրի, եւ որեւէ թերակատարում չի արձանագրվել: Ֆիննախի տվյալներով, 2012թ հունվար-հուլիս ամիսներին ՀՀ պետական բյուջե են մուտքագրվել 476.7 մլրդ դրամ հարկային եկամուտներ, պետական տուրքեր եւ պարտադիր սոցիալական ապահովության վճարներ, որոնք ապահովել են 9-ամսյա ծրագրի 75.9% կատարողական: 2011 թվականի նույն ժամանակահատվածի համեմատ նշված եկամուտներն աճել են 7.1%‑ով կամ 31.7 մլրդ դրամով, ինչը հիմնականում պայմանավորված է ավելացված արժեքի հարկի, շահութահարկի, եկամտահարկի, բնապահպանական ու բնօգտագործման վճարների և ակցիզային հարկի գծով ստացված մուտքերի աճով: «Յուրաքանչյուր տարի ՀՀ կառավարության կողմից ընդունվում է ՀՀ պետական բյուջեի կատարումն ապահովող միջոցառումների մասին որոշում, որտեղ հստակորեն սահմանվում են բյուջեի համամասնությունները: Համաձայն 2011թ դեկտեմբերի 22-ի N 1919-Ն որոշման 1-ին կետի 1-ին ենթակետի 2012թ պետական բյուջեի եկամուտները սահմանվել են ինչպես միշտ եռամսյակային` աճողական համամասնությամբ: Սա նշանակում է, որ բյուջեի եկամուտները տարվա կտրվածքով աճողական դինամիկա ունեն, եւ յուրաքանչյուր հաջորդ եռամսյակի համար, ըստ ծրագրի, նախատեսվում են ավելի շատ հարկային մուտքեր: Մինչ այս ժամանակահատվածը բյուջեի եկամուտների հավաքագրումը կատարվել է, եւ առկա տնտեսական աճի պայմաններում տարեկան պլանի չկատարման որեւէ ազդակ չկա:
Ցավում ենք հիասթափեցնել բոլոր վատատեսական կանխատեսումների հեղինակներին, որոնք արդեն շուրջ 8 ամիս ցանկանում են ըմբոշխնել բյուջեի կատարման տապալումը»,-ասված է ֆիննախի հաղորդագրությունում:
«Առավոտ»
Կարդացեք նաև
