Այսօր Գյումրու Վարդան Աճեմյանի անվան դրամատիկական թատրոնում «Զբաղվածության պետական ծառայություն» գործակալության նախաձեռնությամբ կազմակերպվել էր աշխատանքի տոնավաճառ, որին մասնակցում էին թվով 32 գործատուներ ու առաջարկում էին մոտ 200 աշխատատեղ:
Ամենապահանջվածը փրկարարի, հրշեջի ու նաև ջրմուղագործի մասնագիտությունն էր:
Ամենաշատ հայտեր ներկայացրել էին Արտակարգ իրավիճակների վարչությունն ու «Շիրակ ջրմուղկոյուղի» ՓԲԸ-ն: Չափազանցրած չենք լինի, եթե ասենք, որ ամբողջ Գյումրին տոնավաճառում էր, թե երիտասարդները և թե տարեցները աշխատանք փնտրող էին:
Կարդացեք նաև
Մեզ հետ զրույցում բարձրագույն կրթություն ունեցող, միջին տարիքի մի կին դժգոհեց. «Բավականին լայն շրջանակ է առաջարկվում, բայց հենց մոտենում ես, տարիքդ տեսնելով՝ էլ լսել չեն ուզում: Դա շատ վատ բան է, տարիքային շատ սահմանափակում կա` մինչև 30 տարեկան, բայց մենք թոշակավորվելու ենք 63 տարեկանից, բա սա անելու բա՞ն է, մնացած 33 տարին մարդիկ պիտի օդով սնվե՞ն, թե՞ գնան միանգամից գերեզմանները հերթագրվեն: Ես իմ տարիքի համար ոչինչ չգտա էստեղ, էսօր իրանք ուզում են բարակ, երկար ոտքերով, երկար վզերով գեղեցկուհիներ: Ասա՝ գեղեցկուհիներն էստեղ ի՞նչ գործ ունեն, գեղեցկուհիներն իրենց տեղն ունեն, բնությունն իրենց արդեն իսկ օժտել է հնարավորություններով, այնպես որ, թող խելքները գլուխները հավաքեն ու երկիրը չդատարկեն»:
Մանրամասներն ընթերցեք «Առավոտ» օրաթերթի վաղվա համարում :
Նունե ԱՐԵՎՇԱՏՅԱՆ
