Այսօր Գեղարքունիքի մարզի Մշակույթի տանը տեղի ունեցավ հանրակրթական դպրոցների ուսուցիչների և տնօրենների օգոստոսյան խորհրդակցությունը, որին մասնակցում էր նաեւ ՀՀ կրթության եւ գիտության նախարար Արմեն Աշոտյանը:
Բացման խոսքով հանդես եկավ ՀՀ Գեղարքունիքի մարզպետ Ռաֆիկ Գրիգորյանը՝ գալիք ուսումնական տարում հաջողություններ ցանկանալով կրթական ոլորտի ներկայացուցիչներին. «ՀՀ իշխանությունների համար կրթությունն ամենակարեւոր ոլորտներից է, եւ այս խորհրդաժողովն ամփոփում է նախորդ ուսումնական տարում կատարված աշխատանքներն ու առաջիկա անելիքները»:
Գեղարքունիքի մարզպետարանի աշխատակազմի կրթության, մշակույթի եւ սպորտի վարչության կողմից պատրաստած «2011-2012թթ. ուսումնական տարվա ընթացքում կրթության ոլորտում կատարված աշխատանքների եւ 2012-2013թթ. ուստարվա խնդիրների մասին» հաշվետվությամբ հանդես եկավ վարչության պետ Գարիկ Բադալյանը: Նա հայտնեց, որ 2011-2012թթ. ուսումնական տարում Գեղարքունիքի մարզում գործել է մարզային ենթակայության 87 միջնակարգ, 20 հիմնական, 2 տարրական եւ 1 հակուկ դպրոց, իսկ ԿԳՆ ենթակայության՝ 1 կրթահամալիր, 6 ավագ դպրոց եւ մեկ արհեստագործական ուսումնարան: «Ավագ դպրոցների ստեղծման համակարգի ռազմավարական ծրագրի շրջանակում մեր առաջարկությամբ Մարտունի քաղաքի թիվ 2 միջնակարգ դպրոցը վերակազմակերպվեց ավագ դպրոցի: Համապատասխան ուսումնասիրությունների, վերլուծությունների եւ համայնքների ղեկավարների իրավասու կազմակերպությունների հետ կատարված աշխատանքի արդյունքում ապահովվել է դպրոցահասակ երեխաների ընդգրկումը ուսումնական հաստատություններում: Մարզում չկան հանրակրթությունից դուրս մնացած երեխաներ»,-հավաստիացրեց Գարիկ Բադալյանը:
Կարդացեք նաև
Նա փաստեց, որ որոշակի աշխատանք է կատարվել հատկապես սոցիալապես անապահով ընտանիքների երեխաներին դպրոց ընդգրկելու ուղղությամբ, մասնավորապես, շուրջ 350 երեխա ապահովվել է հագուստով եւ գրենական պիտույքներով:
Հաշվետվության համաձայն, 2011-2012թթ. ուսումնական տարում Գեղարքունիքի դպրոցներում փաստացի կոմպլեկտավորվել է 1585 դասարան՝ 30175 աշակերտով: Գարիկ Բադալյանի փոխանցմամբ, առաջին կիսամյակի ընթացքում Սեւանի արհեստագործական ուսումնարանը եւ Ծաղկունքի միջնակարգ դպրոցն անցել են ԿԳՆ ենթակայության տակ, իսկ Բարեպատի հիմնական դպրոցը չի գործել՝ աշակերտների բավարար քանակություն չունենալու պատճառով: «Մարզի դպրոցներ են ընդունվել 316 աշակերտ, իսկ տեղափոխվել կամ դպրոցը թողել է 488 աշակերտ: Անհրաժեշտ պայմաններ են ապահովվել հատուկ կրթության կարիք ունեցող երեխաների կրթության կազմակերպման համար: Գավառի համար մեկ հիմնական դպրոց ներառական կրթության շրջանակում հաճախում է 16 երեխա: Այս տարվանից 14 աշակերտի համար ներառական կրթություն է կազմակերպվել Ճամբարակի համար 1 միջնակարգ դպրոցում»,-ասաց Բադալյանը:
Ինչ վերաբերում է մարզի աշակերտների առաջադիմությանը, գերազանց առաջադիմություն է ունեցել 4929, հարվածային՝ 6361, եւ միջակ՝ 14.987 աշակերտ, իսկ 160 աշակերտ գրանցել է անբավարար գնահատական:
Հաշվետվության տվյալներով՝ 12-րդ դասարանների 2834 աշակերտից պետական ավարտական քննություններին մասնակցելու թույլտվություն է ստացել 2825-ը, որոնցից 2797-ը հաջողությամբ հանձնելով քննություններ, ստացել են միջնակարգ կրթության ատեստատներ: Մինչդեռ 12-րդ դասարանը տարբեր պատճառներով չի ավարտել 37 աշակերտ:
Գարիկ Բադալյանի խոսքով, դպրոցների կողմից ներկայացված վերոհիշյալ տվյալներն, այնուամենայնիվ, կասկածելի են. «Ինձ համար զարմանալի է այն հանգամանքը, որ ոչ լիարժեք մասնագետներով համալրված դպրոցների աշակերտների միջին առաջադիմությունն ավելի բարձր է, քան լիարժեք մասնագետներով համալրված դպրոցներինը»:
Լուիզա ՍՈՒՔԻԱՍՅԱՆ
