Սա Պատարա գյուղում Ստեփան Գրիգորյանի տունն է, որը նա պատրաստ է երկարաժամկետ եւ անհատույց տրամադրել սիրիահայ հայրենակիցներին:
Սիրիայում կատարվող իրադարձությունները, սիրիահայության գլխին կախված մարտահրավերները մտածելու և վճռական գործելու առիթ են տալիս ամբողջ հայությանը և հատկապես հայկական զույգ հանրապետություններին: Ողջունելով Արցախի իշխանությունների սիրիահայությանը ընդունելու պատրաստակամությունը` ուրախ եմ հայտնելու, որ բազմաթիվ արցախցիներ պատրաստ են իրենց պատկանող տները երկարաժամկետ, առանց վարձի հատկացնել դրա կարիքն ունեցող մեր հայրենակիցներին:
Կարծում եմ` սա լավ առաջարկ է բոլոր այն սիրիահայերի համար, ովքեր կցանկանան բնակություն հաստատել Արցախի գյուղերում, պատրաստ են զբաղվել գյուղատնտեսական աշխատանքով: Արցախի բազմաթիվ գյուղերում կան ազատ տներ, որոնց տերերը մեծ սիրով որոշակի ժամկետով այն կտրամադրեն ցանկացողներին: Վստահ եմ, որ համայնքները իրենց պատկանող հողերից հատկացումներ կանեն նորաբնակ ընտանիքներին:
Արցախի Ասկերանի շրջանի Պատարա գյուղում գտնվող իմ երկրորդ տունը պատրաստ եմ այս նպատակին ծառայեցնել: Պատարայում առնվազն 5 ընտանիք ևս պատրաստ է նման քայլի:
Հույս ունեմ, որ մեր այս քայլը սկիզբ կդառնա մի մեծ ակցիայի, ինչի հետևանքով հնարավոր կլինի մի քանի հարյուր տուն գտնել Արցախի տարբեր գյուղերում:
Կարդացեք նաև
Ստեփան ԳՐԻԳՈՐՅԱՆ
Պատարա գյուղի բնակիչ
