Ի պաշտպանություն Ռուբեն Հայրապետյանի ՝ Սերժ Սարգսյանին ուղղված որոշ մտավորականների նամակն ու մանկապիղծ Սերոբ Տեր-Պողոսյանին ներում շնորհելու որոշ գյուղապետերի միջնորդությունը ԱԺ նախկին պատգամավոր Անահիտ Բախշյանի համար նույն ձեռագիրն ունեն:
«Նույնն է, որ մի քանի մտավորականներ դիմեցին Ռուբեն Հայրապետյանին՝ մանդատից չհրաժարվելու համար, որովհետեւ ինքը բարոյական մարդ է, ինչ-որ նույն ձեռագիրն է, նույն տրամաբանությունը… զուգահեռներ եմ տանում եւ մտածում եմ՝ սա հենց այնպես չի լինում, կարո՞ղ է ինչ-որ մեկն ուզում է այդ ձեւով մեղմացնել հանցանքի կշիռը»,- ասաց Ա. Բախշյանը:
«Ախթալայի» լեռնահարստացուցիչ կոմբինատի սեփականատեր, մանկապղծության համար ազատազրկված Սերոբ Տեր-Պողոսյանին ներում շնորհելու միջնորդություն ներկայացրած գյուղապետերի մասին էլ ասաց.«Այդ մարդիկ երեխա ու թոռ ունեն, թող պատկերացնեն Սերոբ Տեր_Պողոսյանի քայլերը իրենց թոռան կամ երեխայի նկատմամբ, դրանից հետո դիմեն: Եթե մեր երկրում օրենք կա, որը դատապարտում է այդ գործողությունը, ու դա համարվում է քրեական հանցագործություն, եւ դատարանը որոշում է կայացնում, եթե այդքանից հետո ինչ-որ մարդկանց գլխում ծագում է այդ մանկապիղծին հովանավորելու ու պատժից փրկելու հարցը, շատ շատ կասկածում եմ այդ մարդկանց արժեհամակարգի որակի վրա»:
Հիշեցնենք, որ «Հետքի» տեղեկություններով, մանկապիղծի պաշտպանությամբ հանդես են գալիս Ճոճկանի գյուղապետ Սամվել Գիգոլյանը, Քարկոփի համայնքապետ Ժորա Այբեկյանը, Նեղոցի գյուղապետ Սպարտակ Բեգջանյանը և Շամլուղի քաղաքապետ Լենդրուշ Բեժանյանը:
Կարդացեք նաև
Արփինե ՍԻՄՈՆՅԱՆ
