Այսօր «Ազդակ» մամուլի ակումբում քաղաքագետ Ալեքսանդր Մարկարովն անդրադարձավ Սիրիայում տեղի ունեցող վերջին զարգացումներին և այն մարտահրավերներին, որոնց առաջ կանգնել է Հայաստանը: Ա. Մարկարովը նկատեց, որ սիրիական կառավարությունն այսօր ավելի ուժեղ է, այստեղ խոսքը գնում է նաև ուժային կառույցների և զինվորական ուժերի մասին:
Խոսելով սիրիական հակամարտության՝ արտաքին ուժերի ներգրավվածության մասին, քաղաքագետը կանխատեսումներ արեց. «Արտաքին ուժերի միջամտությունն այս կոնֆլիկտում կպարունակի անմիջական հարևանների մասնակցությունը: Արդեն որոշ զարգացումներ տեսնում ենք Լիբանանում, որտեղ ընդհարումներ կան: Ասադյան ուժերը դեռ լայնամասշտաբ ուժային գործողություններ չեն կիրառում, սակայն իրավիճակը կմնա լարված մոտակա կես տարվա ընթացքում»:
Թուրքիա-Սիրիա հարաբերությունների մասին էլ քաղաքագետն ասաց. «Մեղրամիսը երկու նախագահների միջև ավարտվել է: Ուստի Թուրքիան սպասում է որոշ որոշումների»:
Ա. Մարկարովը փաստեց, որ հակամարտության մեջ ներգրավված են Կատարը, Սաուդյան Արաբիան, շահագրգիռ կողմ է նաև Իրանը: Հարցին հնարավո՞ր է Ադրբեջանն օգտվի տարածաշրջանային խառը իրավիճակից և փորձի ԼՂՀ հակամարտության հարցում դիմել ռազմական միջամտության, պարոն Մարկարովը պատասխանեց. «Մի անգամ նա փորձել է այդ քայլին դիմել, բայց անօգուտ և տխուր հետևանքներ: Ադրբեջանն այսօր շարժվում է մեկ քայլ առաջ, երկու քայլ ետ տրամաբանությամբ և իրականացնում փոքր պրովոկացիաներ: Ուստի չեմ կարծում նման զարգացումներ»:
Կարդացեք նաև
Ա. Մարկարովը լրագրողների խնդրանքով անդրադարձավ նաև այն հարցին արդյոք նպատակահարմար է ՀՀ-ի անդամակցությունը ԵվրազԵս-ին: Նա նշեց. «Առայժմ ձևաչափը և համապատասխան կառույցները, որ պիտի գործեն այս դաշտում, հստակ չեն: Իսկ երբ հստակ դառնա, արդեն կարելի է մտածել մասնակցության ձևաչափերի և մասնակցության աստիճանի մասին»:
Տաթև ՀԱՐՈՒԹՅՈՒՆՅԱՆ
