Ռուսաստանի նախագահ Վլադիմիր Պուտինը սեղմում է Կրասնոդարի նահանգապետ Ալեքսանդր Տկաչովի ձեռքը, Սոչի, հունիս, 2011թ.
Վերջին ժամանակաշրջանում հայազգի Սուրեն Ղազարյանը դարձել է ռուսաստանյան մամուլի կողմից ամենից հաճախ հիշատակվող գործիչներից մեկը. նա իսկական պատերազմ է հայտարարել թե՛ Կրասնոդարի երկրամասի, թե՛ Ռուսաստանի դաշնային իշխանություններին։
Կրասնոդարցի բնապահպան Սուրեն Ղազարյանի դեմ կիրակի օրը քրեական գործ է հարուցվել։ Երկրամասի իրավապահ մարմինները նրան մեղադրում են մի շինության անվտանգության ծառայության աշխատակցին սպառնալու մեջ, որը, որոշ աղբյուրների տարածած տեղեկության համաձայն, Ռուսաստանի նախագահ Վլադիմիր Պուտինի առանձնատունն է։
Ղազարյանը երեկ «Ինտերֆաքս» լրատվական գործակալությանը հայտնել է, որ իրեն ձերբակալել են Գելենջիկի մոտակայքում` Դիվնոմորսկոյե գյուղում, որտեղ պետք է անցներ Ֆյոդոր Շչերբինայի հիշատակին նվիրված բողոքի ցույցը։
Գելենջիկի շրջանի Իդոկոպաս տեղանքում կառուցվող «Պուտինի առանձնատան» մոտ մի քանի անգամ միջադեպեր են արձանագրվել Սուրեն Ղազարյանի եւ պահակախմբի միջեւ, եւ շենքի անվտանգության ծառայության Պիրոգով ազգանունով աշխատակիցը հայազգի բնապահպանի դեմ հայց է ներկայացրել, որտեղ նշել է, թե Ղազարյանը իրեն սպառնացել է սպանել։
Կարդացեք նաև
Երեկ երեկոյան Սուրեն Ղազարյանին բաց են թողել, սակայն նրա դեմ նոր քրեական գործ են հարուցել։
Ավելի վաղ` հունիսի 20-ին Տուապսեի դատարանը Հյուսիսային Կովկասի բնապահպանների կազմակերպության անդամներ Եվգենի Վիտիշկոյին եւ Սուրեն Ղազարյանին մեղավոր էր ճանաչել Կրասնոդարի նահանգապետ Ալեքսանդր Տկաչովի առանձնատան պարիսպը փչացնելու մեջ եւ նրանց դատապարտել երեք տարվա պայմանական պատժի։
Երեկ ուշ երեկոյան ռուսաստանյան մամուլը տեղեկություն է տարածել այն մասին, որ ձերբակալվել են բնապահպանների կազմակերպության եւս երկու ակտիվիստներ, որոնք բողոքում էին Սուրեն Ղազարյանի ձերբակալման դեմ։
Նշենք նաեւ, որ հայազգի հայտնի բնապահպանը ցանկանում է ընտրվել Կրասնոդարի երկրամասի խորհրդարանի պատգամավոր։
Ազա Բաբայան
«Ազատություն» ռադիոկայան
