«Որևէ հանրապետական թեկնածուի հետ կապված որեւէ խոսք դուք մեզանից չեք լսի: ԲՀԿ-ն ՀՀԿ-ին սատարել չի կարող»,- օրերս ասուլիսում ԲՀԿ մամլո խոսնակ Տիգրան Ուրիխանյանի արտահայտած այս խոսքերը տարբեր մեկնաբանությունների առիթ են դարձել:
Այս օրերին ՀՀԿ-ականները, Ուրիխանյանին ի պատասխան` պարզաբանումներ են տալիս տարբեր ԶԼՄ-ների ու հայտնում, որ իրենք էլ ԲՀԿ թեկնածուներին չեն սատարում: ՀՀԿ փոխնախագահ Գալուստ Սահակյանը 1-in.am-ին ասել էր, որ Սամվել Բալասանյանին իրենք ընկալում են ոչ թե որպես ԲՀԿ թեկնածու, այլ կարծում են, որ նա լուրջ եւ արժանի թեկնածու է Գյումրիի համար:
Այս առնչությամբ այսօր Aravot.am-ը պարոն Ուրիխանյանին խնդրեց մեկնաբանել, թե եղե՞լ է քաղաքական որոշում ՀՀԿ թեկնածուներին ՏԻՄ ընտրություններում չսատարելու: Նա պատասխանեց. «Եկեք հասկանանք իրավիճակը: Այս 3 օր է` բոլորը հայտարարություն-հայտարարություն են ասում, իրենք իրենց հնարում ու իրենք իրենց մեկնաբանում: Լրագրողները պետք է հստակություն պահպանեն: Ասուլիսում հարց են տվել եւ հարցին պատասխան է տրվել, ի՞նչ հայտարարության մասին է խոսքը: Ընդ որում թեկնածուների մասին խոսք չի եղել, հարցրել են` հնարավո՞ր է ՀՀԿ-ին սատարեք, ես էլ պատասխանել եմ»:
Ինչ վերաբերում է Գալուստ Սահակյանի մեկնաբանությանը` Տիգրան Ուրիխանյանի դիտարկմամբ`«Գալուստ Սահակյանը շատ ճիշտ է ասել, նույնն էլ ես եմ ասել` ՏԻՄ ընտություններում սեւով սպիտակի վրա արտահայտիչ մի միտք է գնում եւ մեր արտահայտված մոտեցումներում կարմիր թելի պես մի պարզ ճշմարտություն է գնում` ՏԻՄ ընտրություններում առաջնորդվել հարկավոր է անհատների գործոնով, որովհետեւ դրանք քաղաքական ընտրություններ չեն եւ պետք են մարդիկ, անհատներ, որոնք ապահովելու են արդյունավետ լուծումներ` տարբեր տեսակի խնդիրներին»:
Կարդացեք նաև
Մենք ճշտեցինք` առաջնորդվելով այդ սկզբունքով` ԲՀԿ-ն էլ հնարավոր չէ՞ սատարի որեւէ անձի, թեկուզ ՀՀԿ-ական, որը կգտնեք, որ արժանի կլինի տվյալ համայնքի համար: Տիգրան Ուրիխանյանը պատասխանեց. «Խնդրում եմ ի լուր բոլորի հայտարարեք` լրագրողի կողմից այդ հարցը հնչել է եւ կա այդ հարցի հստակ պատասխան, ես այդ հարցի շուրջ էլ չէի ուզենա խոսել: Ես արդեն պատասխանել եմ»:
Հռիփսիմե ՋԵԲԵՋՅԱՆ
