«Շնորհակալություն Հովիկ Աբրահամյանին»,- տրանսպորտի եւ կապի նախարար Գագիկ Բեգլարյանը Aravot.am-ի հետ զրույցում այսպես պատասխանեց, երբ նրան փոխանցեցինք, որ ԱԺ նախագահ Հովիկ Աբրահամյանը որոշել է բարեգործություն անել, օգնել ոսկրածուծի փոխպատվաստման կարիք ունեցող մի երեխայի:
Հիշեցնենք, որ այս օրերին մամուլում ու սոցիալական ցանցերում թեժ քննարկվում է, թե ինչու է Հովիկ Աբրահամյանը, օգնելով նեյրոլեյկոզ հիվանդությամբ տառապող 6-ամյա Նարեկ Մարտիրոսյանին ու նրա հաշվեհամարին գումար փոխանցելով՝ այդ մասին նշում ֆեյսբուքյան իր պաշտոնական էջում, չէ՞ որ Աստվածաշունչն ասում է՝ աջ ձեռքդ չպիտի իմանա, թե ինչ է անում ձախը:
Պարզվում է՝ ի տարբերություն Հովիկ Աբրահամյանի, Գագիկ Բեգլարյանը նման բարեգործություններ շատ է անում, բայց ոչ Ֆեյսբուքում է գրում, ոչ էլ որեւէ մեկին պատմում է այդ մասին:
Մեր հարցին, թե Դուք երբեւցե որեւէ մեկին օգնե՞լ եք, մի հիվանդ երեխայի, կամ ցանկացած մեկին, մենք երբեւիցե կիմանա՞նք, որ Դուք որեւէ բարեգործություն եք արել՝ պարոն Բեգլարյանը պատասխանեց. «Դուք երբեւիցե լսե՞լ եք, որ ես բարեգործություն անեմ: Չեք լսել: Նշանակում է՝ անում եմ ու չեմ բարձրաձայնում դրա մասին»: Մենք ճշտեցինք՝ թե՞ չեք անում. «Որ մանրամասն հետաքրքրվեք՝ կլսեք այդ մասին: Ես ինձ չեմ հակասի ու չեմ ասի, թե ինչ բարեգործություններ եմ արել, որովհետեւ ասացի՝ անում եմ ու չեմ ասում: Լավ հետաքրքրվեք՝ կարող է եւ լսեք իմ բարեգործությունների մասին»:
Կարդացեք նաև
Հռիփսիմե ՋԵԲԵՋՅԱՆ
