Պարույր Հայրիկյանին հարցրինք, թե այսօր Հայաստանի իշխանությունը պատկերացնո՞ւմ է Հայաստանի իրական վիճակը, իշխանությանը մատուցվո՞ւմ է երկրի դրության վերաբերյալ ճշմարիտ տեղեկատվություն: Նա ասաց. «Ցավոք սրտի, իշխանությունը միայն Սերժ Սարգսյանն է: Ահավոր բան է դա: Որոշում կայացնելու հարցում բոլորը, սկսած ինչ-որ կարիքավորի բնակարան հատկացնելուց վերջացրած շատ կարեւոր ազգային խնդրով, ամեն ինչ կարող են մոռանալ եւ դառնալ-նայել, թե ինչ կասի Սերժ Սարգսյանը: Ես չգիտեմ` դրանից Սերժ Սարգսյանը իրեն ավելի լա՞վ է զգում, թե՞ վատ պիտի զգա: Ես, օրինակ, ինձ շատ վատ կզգայի, եթե իմ կրթության նախարարն իրեն վերաբերող հարցի մասին ինձ հարցներ, ես իրենից պիտի պատասխան ստանամ: Ես ձեզ մի փաստ բերեմ, մի քիչ սիրուն չէ, այնուամենայնիվ: Խոսում եմ շատ բարձր պաշտոն ունեցող մարդու հետ: Խոսում ենք մի հարցի մասին, ինքը ասում է, որ հասկացել է, խնդիրը շատ լուրջ է: Ինքն ասում է, որ հոդվածը կարդացել է, ֆիլմն էլ նայել է: Մի շաբաթ հետո ենք խոսում: Ասում եմ` նախագահի հետ խոսել եմ, ցավոք սրտի, դեռ ֆիլմը չէր նայել, հոդվածն էլ չէր կարդացել: Ասում է` ես էլ չեմ կարդացել, ասում եմ` բայց ֆիլմը նայել ե՞ս, ասում է` չէ, ֆիլմն էլ չեմ նայել: Նույնիսկ այն, որ ֆիլմը նայել է, ինձ հետ կարծիք է փոխանակել, եթե նախագահը չի կարդացել, ուրեմն ինքն իրավունք չունի նախագահից առաջ կարդալու: Այդ է մակարդակը: Այնպես որ իշխանության մասին հարցնում եք, կարելի է շատ հանգիստ խոսել միայն Սերժ Սարգսյանի մասին: Սերժ Սարգսյանը գտնում է, որ ինքն անում է առավելագույնը»:
Ոսկան ՍԱՐԳՍՅԱՆ
