Այսօր «Զարկերակ» ակումբում քաղաքագետ Արմեն Մինասյանը, խոսելով ՏԻՄ նախընտրական շրջանից, ասաց, որ թեկնածուների կողմից առաջադրումներն ու ինքնաբացարկները կրում են տեխնիկական բնույթ. «Եթե առաջադրվում է մեկ թեկնածու, ընտրությունները համարվում են չկայացած: Գրանցվեց դեպք, երբ միաժամանակ առաջադրվեցին հայրը և աղջիկը, սակայն հետագայում նրանք նույնպես ինքնաբացարկ կտան»:
Ինչ վերաբերում է ընդդիմության քիչ թվով ներկայացուցիչների առաջադրմանը, քաղաքագետը պատճառը տեսնում է ոչ բավարար ռեսուրսներ ունենալու մեջ. «Դա հատկապես վերաբերում է ՀԱԿ-ին: Հիշենք, որն փետրվարին Հրազդանում տեղի ունեցած ընտրությունների ժամանակ շրջանառվում էին ՀԱԿ-ի թեկնածուներից երկուսի անունը, ովքեր այդպես էլ չառաջադրվեցին: Ներկայումս ընդդիմության ռեսուրսներն ավելի սուղ են, քանի որ ՏԻՄ ընտրություններն ընթանում են 800 համայնքում»:
Արմեն Մինասյանի խոսքով` ՏԻՄ ընտրությունները չեն կրում քաղաքական բնույթ, քանի որ չկա քաղաքական մրցակցություն. «Տեղերի համար առաջացած կոնֆլիկտներն ինտեգրվում են միայն ազգային մակարդակ` չմտնելով քաղաքական մրցակցության մեջ»:
Քաղաքագետը նաև նշեց, որ ՏԻՄ ընտրություններն ազդեցություն չեն ունենա առաջիկա նախագահական ընտրությունների վրա. «Նախագահական ընտրությունների պարագայում սցենարները տարբեր են, ենթադրություններ անելու համար դեռ վաղ է: Այնուամենայնիվ, կենտրոնում են ՀՀԿ-ն եւ ԲՀԿ-ն: Չի բացառվում, որ ԲՀԿ-ն կսատարի Սերժ Սարգսյանին»:
Արմեն Մինասյանը փաստեց, որ անկախ թեկնածուները, վերջիվերջո, համալրում են իշխանական կուսակցության շարքերը. «Առաջադրումների պատկերը ցույց է տալիս, որ առաջիկա ՏԻՄ ընտրություններում որակական փոփոխություններ չեն գրանցվի»:
Կարդացեք նաև
Լուիզա ՍՈՒՔԻԱՍՅԱՆ
