Այսօր «Պոստ սկրիպտում» մամուլի ակումբում լրագրողների հետ հանդիպմանը ԲՀԿ երիտասարդական թևի ղեկավար Վահե Էնֆիաջյանն ու ԲՀԿ-ի եվրասիական գործընկերները ներկայացրին Ծաղկաձորում օգոստոսի 22-ին մեկնարկած 1-ին եվրասիական երիտասարդական հավաքը: Հավաքի փակումը տեղի կունենա օգոստոսի 27-ին: Կազմակերպիչները տեղեկացրին, որ հավաքի հիմնական նպատակն է փորձի փոխանակումը, մշակութային եզրեր գտնելը և այլն: Հավաքին մասնակցում են 14 երկրներից շուրջ 700 մասնակիցներ: Դասընթացներն անցկացվում են երեք ուղղություններով՝ երիտասարդ լրագրողներ, ձեռնարկատերեր և քաղաքական գործիչներ:
«Եդինայա Ռոսիա» խմբակցության Մոսկվայի քաղաքային դումայի պատգամավոր Իվան Նավիցկինը նկատեց. «Սա Եվրասիական նախագիծ է: Երիտասարդներրի կողմից կա մեծ հետաքրքրվածություն: Իսկ դա մի յուրօրինակ էներգետիկա է հաղորդում մեզ»:
Վ. Էնֆիաջյանը տեղեկացրեց, որ հավաքից հետո նախատեսվում է նաև մի շարք փաստաթղթերի ստորագրում: Լրագրողները հետաքրքրվեցին, արդյոք ԲՀԿ-ի՝ նման հավաքի կազմակերպումը չի՞ նշանակում դեմ գնալ ՀՀ իշխանություններին, այն դեպքում, երբ նրանք հայտարարում են, որ ՀՀ-ի՝ Եվրասիական համագործակցությունը նպատակահարմար չէ: Վ. Էնֆիաջյանը պատասխանեց. «Արևմուտքի հետ կապված որևէ խնդիր չենք տեսնում, մենք համագործակցում ենք նաև Արևմուտքի հետ, նրանց հավաքներին էլ ենք մասնակցություն ցուցաբերում: Մենք լայնածավալ աշխատանքներ ենք տանում տարբեր ուղղություններով: ՀՀ իշխանություններին դեմ և կողմ լինելու հարց չկա: Մենք լայնածավալ ինտեգրման աշխատանքներ ենք տանում»:
Տաթև ՀԱՐՈՒԹՅՈՒՆՅԱՆ
