1990թ. օգոստոսի 23-ին Գերագույն խորհրդի առաջին նիստում ընդունվեց Հայաստանի Անկախության մասին հռչակագիրը: Իսկ մեկ օր անց, հիմնվելով «Հայաստանի անկախության մասին» հռչակագրի վրա, ՀԽՍՀ Գերագույն խորհուրդը որոշեց Խորհրդային Հայաստանը վերանվանել Հայաստանի Հանրապետություն:
Aravot.am-ը Հովհ. Թումանյան անվան տիկնիկային թատրոնի տնօրեն Ռուբեն Բաբայանից հետըաքրքրվեց՝ ի՞նչ զգացողություն ունի Անկախության հռչակագրի ընդունման 22-ամյակի առիթով: «Անկախության զգացողությունն ամենահրաշալի զգացողությունն է, եւ ես ուզում եմ եմ այս օրվա առիթով անպայման շնորհավորել բոլորին ու ասել, որ այս տարիները մեզ ավելի խելոք դարձրին Անկախության իմաստը հասկանալու առումով: Մենք հասկացանք, որ միգուցե զուտ դեկլարատիվ ձեւով հչակագիր ընդունելով՝ դեռ չես անկախանում, անկախությունն ավելի շատ ներքին հարց է: Եվ մինչեւ Հայաստանի Հանրապետության քաղաքացիները ներքուստ իրենց ազատ չզգան, հաստատ մեր Անկախության հռչակագիրը կմնա պարզապես մի գեղեցիկ փաստաթուղթ: Ես կարծում եմ, որ անկախության ձեռքբերումը յուրաքանչյուր քաղաքացու խնդիրն է, եւ սպասել, որ ինչ-որ մի տեղից կգան եւ քեզ կնվիրեն անկախություն, անիմաստ է»,-ասաց արվեստագետը:
Գոհար ՀԱԿՈԲՅԱՆ
