Էկոլոգիական դաշինքի համակարգող Սիլվա Ադամյան
Հատուկ պահպանվող տարածքների վերաբերյալ օրենքը փոփոխությունների ենթարկվելուց հետո էլ մի շարք թերություններ ունի: Ներկայումս նոր օրինագիծը քննարկման փուլում է եւ խորհրդարան գնալուց առաջ բնապահպանները ցանկանում են «ջրի երես» հանել այդ թերությունները: Այսօր «Արմատ» մամուլի ակումբում, Էկոլոգիական դաշինքի համակարգող Սիլվա Ադամյանը նկատեց, որ օրինագծում հստակ սահմանափակում դրված չէ, որ այդ տարածքներում հանքարդյունահանությունն արգելվում է:
Ըստ, ասուլիսին ներկա «Երիտասարդ կենսաբանների ասոցացիա» հ/կ ներկայացուցիչ Արսեն Գասպարյանի, օրինակ`արգելոցների դեպքումգրված է, որ հանքի շահագործումը բաց եղանակով, արգելվում է. «Մենք պահանջում ենք, որ նույնիսկ փակ եղանակով արգելվի: «Շիկահող» պետական արգելոցին կիպ կպած, ոսկու հանք են շահագործում»:
Օրինագծում հստակեցված չէ նաեւ, թե էկոտուրիզմի զարգացումն ինչպես պետք է լինի հատուկ պահպանվող տարածքներում: Բնապահպանները ճիշտ չեն համարում նաեւ տեղական ինքնակառավարման մարմինների եւ համայնքի ներգրավումը այդ տարածքների պահպանման գործում: Արսեն Գասպարյանի խոսքերով. «Բնության հուշարձանները պետք է լինեն պետության հոգածության ներքո, իսկ կառավարությունն իրականացնի վերահսկողությունը, որպեսզի մի աղբյուր պատասխանատու լինի այդ ամենի համար»:
Սիլվա Ադամյանը հստակեցրեց, թե որն է արգելոց, որը` արգելավայր, որը` Ազգային պարկ. «Արգելոցում մարդու միջամտությունը` բացառվում է, մարդ չի կարող այնտեղ որեւէ գործունեություն ծավալել, սակայն մեզ մոտ հակառակ օրենքի պահանջին, հակահրդեհային ճանապարհներ են անցկացնում, տնակներ են տեղադրում: Արգելավայրը բաց է տուրիզմի համար: Այնտեղ կարելի գիտահետազոտական աշխատանքներ իրականացնել, նույնիսկ փոքրիկ տնակներ դնել: Ազգային պարկը կարող է անգամ հանգստավայր ծառայել»:
Լուսինե ԲՈՒԴԱՂՅԱՆ
