Այսօր, ՀՀ սփյուռքի նախարարությունում տեղի ունեցավ հավաք-խորհրդակցություն, որին մասնակցում էին նաև սիրիահայեր: Օրակարգում դրված էին հրատապ խնդիրներ` կապված կեցության, կրթության, առողջապահության, փաստաթղթերի ձեւակերպումների եւ այլ հարցերի հետ:
Բացման խոսքով հանդես եկած ՀՀ սփյուռքի նախարար Հրանուշ Հակոբյանն ասաց, որ նախարարությունում ստեղծվել է հատուկ աշխատանքային խումբ, որը համակարգում է սիրիահայերի կետ կապված խնդիրները: «Օրական 10-15 սիրիահայ է այցելում նախարարություն եւ ստանում համապատասխան խորհրդատվություն եւ աջակցություն: Մենք հետամուտ ենք նրանց հետ կապված բոլոր խնդիրների լուծմանը»,-ասաց Հրանուշ Հակոբյանը:
Սիրիահայերի խնդիրներով զբաղվող աշխատանքային խմբի ղեկավար Ֆիրդուս Զաքարյանը հայտնեց, որ երեկ Սփյուռքի նախարարի մոտ կայացած միջգերատեսչական խորհրդակցության արդյունքում առանձնացվել և համակարգվել են սիրիահայերի հետ կապված ընդհանրական և անհատական խնդիրները:
«Ընդհանրական խնդիրներից էր վիզաների և անձնագիրների հարցը: Կառավարության համապատասխան որոշմամբ` սիրիահայերն անձնագիր կստանան Սիրիայում, իսկ վիզա` ՀՀ սահմանը հատելուց: Նրանք, ովքեր ինչ-ինչ պատճառներով չունեն ծննդյան վկայականներ, անձնագիր կստանան ընտանեկան գրքույկի հիման վրա: Անհատական խնդիրները վերաբերում են հիմնականում աշխատանք եւ կացարան գտնելուն: Խնդրին դրական լուծում է տվել միգրացիոն պետական ծառայությունը»,-ասաց պարոն Զաքարյանը:
Կարդացեք նաև
Խոսելով սիրիահայ երեխաների կրթության ապահովման խնդրից` Երեւանի քաղաքապետարանի կրթության վարչության պետ Գայանե Սողոմոնյանն ասաց, որ երեկ եւ այսօր վարչությունն ընդունել է 15 սիրիահայ ընտանիքի 21 երեխայի. «Ծնողների ցանկությամբ բոլորը տեղավորվել են իրենց բնակության վայրին մոտ գտնվող դպրոցներում: Նույն սկզբունքը կիրառվել է նաև մանկապարտեզների հարցում: Մանկապարտեզում երեխաները կստատան անվճար ուսուցում եւ սնունդ, իսկ դպրոցի ուսուցումը, ինչպես գիտենք, անվճար է»:
Համալսարանական կրթության շուրջ նախարար Հրանուշ Հակոբյանն ասաց, որ 12-րդ դասարանն ավարտած և նվազագույն գիտելիքներ ունեցող սիրիահայ երիտասարդները հնարավորություն կունենան ընդունվել բուհի անմիջապես առաջին կուրս. «Իսկ եթե կրթությունը Սիրայում կիսատ է մնացել, դիմորդը կարող է ընդունվել եւ սովորել նույն կուրսում, եթե առարկաների միջև եղած տարբերությունը չի գերազանցում 8-ը: Հակառակ դեպքում դիմորդը նստում է մեկ կուրս ցածր»:
Առողջապահության փոխնախարար Հայկ Դարբինյանը նշեց, որ առաջնային պոլիկլինիկական բուժօգնությունը անվճար է. «Անհետաձգելի դեպքերում սիրիահայերի համար բուժօգնությունը նույնպես անվճար է, սակայն պլանային բուժումները և վիրահատությունները չեն կարող լինել անվճար»:
Լուիզա ՍՈՒՔԻԱՍՅԱՆ
