Այսօր «Նովոստի Արմենիա» ակումբում ֆինանսների փոխնախարար Վարդան Արամյանը ներկայացրեց մեր երկրում առկա սոցիալ-տնտեսական վիճակը: Նրա խոսքերով` «7.7 % տնտեսության ակտիվության ցուցանիշ ունենք: Խնդրում եմ դա չշփոթել տնտեսական աճի հետ: Կարեւոր ճյուղերում աճ ենք ունեցել. արդյունաբերությունն աճել է 13.4%-ով, ընդ որում, հաշվի առնելով, որ այդ ճյուղերում աճ ենք ունեցել ճգնաժամից հետո, կտեսնեք, որ կա որակական փոփոխություն: Շատ են քննադատությունները, որ արդյունաբերությունը կենտրոնացած է միայն հանքարդյունաբերության վրա: Այդպես չէ: Ուշադրություն դարձրեք, թե ինչպես է փոխվել արտահանման տեսակարար կշիռը: Ունենք համեստ գնաճ` 2.2%, պարենային ապրանքների գները շատ ցածր են»:
Լրագրողները հորդորեցին խոսել գործազրկությունից, արտագաղթից, արտաքին պարտքից: Պարոն Արամյանի ներկայացմամբ` «Գործազրկության աճ նկատվում է նաեւ եվրոպական երկրներում: Հունաստանում 7%-ից հասել է 22-24 %-ի: Համեմատության մեջ պետք է նայել: Հիշեք 2009-ին ինչ էր նկատվում, հիմա գործազրկության աճ չկա»:
Ինչ վերաբերում է աղքատության մակարդակին, փոխնախարարի խոսքերով` աղքատության ցուցանիշը հաշվելու մեթոդոլոգիան է փոխվել, դրա համար թվում է, թե աղքատությունն աճել է 12 կետով, մինչդեռ այն աճել է 5 կետով. «Աղքատությունը 2008-ին 23% էր, 2010-ի հարցման արդյունքներով դարձել է 27.6 %: Կուրծք ծեծելու բան չի, որ մենք բոլոր հարցերը լուծել ենք, բայց մենք արել ենք այն, ինչ բյուջեի սահմաններում է»:
Կառավարության արտաքին պարտքը 3.6 մլրդ դոլար է, որից ներքին պարտքը հանած` 3.1 մլրդ է կազմում: Ըստ Վարդան Արամյանի` «Պարտք վերցնելը վտանգավոր չէ, վտանգավոր է այն չմարսելը»: Հարցին` Հայաստանում այսօր քանի՞ օլիգարխ կարող են ցանկության դեպքում փակել մեր երկրի արտաքին պարտքը` Վարդան Արամյանը պատասխանեց. «Ես չեմ տիրապետում իրենց եկամուտներին»:
Կարդացեք նաև
Լավատեսական թվեր եւ աճի մի շարք ցուցանիշներ ներկայացնելուց հետո լրագրողները ֆինանսների փոխնախարարին մի քանի անգամ խնդրեցին քաղաքացիների համար մատչելի ասել, կոնկրետացնել, թե այդ թվերն ինչպես են անդրադարձել կյանքի վրա, ինչն է փոխվել: Փոխնախարարը պատասխանեց. «Կոնկրետացնեմ` իմ հորեղբոր տղայի աշխատավարձը բարձրացել է»:
Ավելի ուշ Aravot.am-ը պարոն Արամյանից հետաքրքրվեց` Ձեր հորեղբոր տղան ո՞ր կուսակցությանն է պատկանում: Նա վստահեցրեց, որ ՀՀԿ-ական չէ, անկուսակցական է, աշխատավարձը նախկինում եղել է 150 հազար դրամ, հիմա դարձել է 250 հազար, աշխատում է որպես փաստաբան:
Դիտարկմանը, որ Ձեր հորեղբոր տղայի աշխատավարձը բարձրացել է, մեր քեռու, մեր հորեղբոր ընտանիքները գնացել են երկրից, արտագաղթել են` պարոն Արամյանը պատասխանեց. «Այդ տենդենցը 93-ից սկսած` կա: Գիտեք ովքեր են գնում, մարդիկ են, որոնք հիմնականում այն ճյուղերից են, որոնք չեն կարողանում աշխատատեղ ստեղծել»:
Հռիփսիմե ՋԵԲԵՋՅԱՆ
