Արտակ Նազարյանի մահվան գործով դատավարության օգոստոսի 21-ի նիստում, օրվա երկրորդ կեսում դատավոր Սամվել Մարդանյանը անդրադարձավ նախկինում ներկայացված միջնորդություններին: Տուժողի իրավահաջորդի ներկայացուցիչ, իրավապաշտպան Ռուբեն Մարտիրոսյանը դատարանին միջնորդություն էր ներկայացրել, որը վերնագրված էր` «հաղորդում հանցագործության մասին»: Այդ միջնորդությունը պնդելով` իրավապաշտպանը վերստին անդրադարձավ նախաքննական մարմնի կողմից թույլ տված, «հանցագործություններին եւ ապօրինություններին»: Նա ասաց, որ նախաքննական մարմինն այդպես էլ չի պարզել, թե ովքեր են ծեծել եւ խոշտանգել Արտակ Նազարյանին, նրան պատճառել ընդհանուր առմամբ 54 մարմնական վնասվածք, քննիչները չեն պարզել, թե մահից մեկ-մեկուկես ժամ առաջ ում հետ է ոգելից խմիչք օգտագործել Ա. Նազարյանը: Դեպքից հետո քննիչ Սարգիս Մադաթյանը ժայռաբեկորի մոտ Արտակի արյան կամ ուղեղանյութի հետքեր չի հայտնաբերել, սակայն դրանից 8 ամիս անց գործով նոր քննիչ Լեւոն Պետրոսյանը նույն տեղում հայտնաբերել է արնանման հետքեր: Լ. Պետրոսյանը, սակայն , դրանք քարից չի քերել, փաթեթավորել, կնքել, ուղարկել դատաբժշկին, պարզելու համար, թե դա արյո՞ւն է, ո՞ւմ արյունն է: Ռուբեն Մարտիրոսյանը նշեց, որ քննիչը փոխել է գործի կարեւոր ապացույց համարվող պարկուճը, այլ պարկուճ ուղարկել դատական փորձագետին, Արտակ Նազարյանի ինքնաձիգի վրա առկա մատնահետքերը ոչնչացվել են, քննիչը կեղծել է դեպքի վայրի տեղազննության արձանագրությունը: Իրավապաշտպանն ասաց, որ նախաքննական մարմինը թաքցրել է դատաբժշկի կողմից քննիչին ուղարկված Արտակ Նազարյանի հետմահու 3 լուսանկար: Ինչո՞ւ Արտակ Նազարյանի հագուստը դատաքիմիական եւ դատակենսաբանական փորձաքննության չի ենթարկվել` հարցրեց Ռ. Մարտիրոսյանը: Վերջինիս ներկայացրած միջնորդությունը լրացրեց Ծովինար Նազարյանը, դրան միացան ամբաստանյալ 3 զինվորների պաշտպան Ալվարդ Մնացականյանը, Հակոբ Մանուկյանի պաշտպաններ Հրանտ Գեւորգյանը եւ Արմինե Ղասաբողլյանը, Վահագն Հայրապետյանի պաշտպան Լեւոն Պողոսյանը:
Մեղադրող Հայկ Հարոյանը դեմ էր միջնորդությանը: Սակայն միջնորդության դեմ նրա հակափաստարկները թույլ էին եւ անհամոզիչ : Օրինակ, անդրադառնալով այն հարցին, թե ինչո՞ւ դեպքի վայրի առաջին տեղազննության ժամանակ քննիչ Սարգիս Մադաթյանը ժայռաբեկորի մոտ արյուն չի հայտնաբերել, իսկ դեպքից 8 ամիս անց քննիչ Լեւոն Պետրոսյանը արնանման հետքեր է տեսել, մեղադրողը դա բացատրեց Մադաթյանի ոչ փորձառու եւ Պետրոսյանի հմուտ քննիչ լինելու հանգամանքով: Նա փորձեց վիճարկել Արտակ Նազարյանի մարմնական վնասվածքների թիվը, դրանք համարելով 7: Ի պատասխան Ռուբեն Մարտիրոսյանը ընթերցեց դատաբժշկի եզրակացությունը` թվարկելով Արտակ Նազարյանի ստացած վնասվածքները: Մեղադրողը վկա Արտակ Մնացականյանի ` նույն ժամին տարբեր քննիչների մոտ առերեսման մասնակցելու վերաբերյալ արձանագրությունների առթիվ հայտարարեց, որ հավանաբար քննիչների ժամացույցները լավ չեն աշխատել: Վկա Արտակ Հովհաննիսյանը դատարանում հայտարարել էր, որ դեպքի վայրի տեղազննության ժամանակ ինքը ընթերակա չի եղել, որը սակայն առկա է գործի նյութերում: Մեղադրողն այս առթիվ հայտարարեց, որ մեր բանակի զինվորների իրավագիտակցությունը ցածր է, եւ նրանք հաճախ չեն հասկանում իրենց մասնակցությամբ քննչական գործողությունները: Իրավապաշտպան Ռ. Մարտիրոսյանը դատարանին միջնորդեց դիմել հատուկ քննչական ծառայություն, որպեսզի նախաքննության ընթացքում ապօրինություններ թույլ տված քննիչների նկատմամբ քրեական գործ հարուցվի` պաշտոնական լիազորությունների գերազանցման եւ պաշտոնական կեղծիքի մեղադրանքով: Դատավորը որոշեց այդ միջնորդությանը մերժել,այն համարելով ժամանակավրեպ,նաեւ հայտարարեց, որ դատավճիռ կայացնելիս համապատասխան հիմքերի առկայության դեպքում դատարանը պարտավոր է լրացուցիչ որոշում ընդունել, որով պետական համապատասխան մարմնի ուշադրությունը կհրավիրի նախաքննության ընթացքում թույլ տրված էական խախտումների վրա: Այս գործով դատական հաջորդ նիստը կկայանա օգոստոսի 28-ին:
Ոսկան ՍԱՐԳՍՅԱՆ
