Օգոստոսի 29-ից սեպտեմբերի 9-ը Լոնդոնում կայանալու են 14-րդ պարալիմպիկ խաղերը, որին Հայաստանից մասնակցելու են երկու աղջիկներ` ծանրորդ Գրետա Վարդանյանն ու լողորդ Մարգարիտա Հովակիմյանը:
Պարալիմպիկ խաղերի մասնակիցները հանգրվանելու են նույն օլիմպիական ավանում, մրցելու են նույն մարզաբազաներում: Կատարվելու են բացման եւ փակման հանդիսավոր արարողություններ, պարալիմպիկ խաղերի ջահի վառում, մասնակից երկրների շքերթ:
Այսօր «Պոստ սկրիպտում» մամուլի ակումբում հրավիրված ասուլիսում «Փյունիկ» հաշմանդամների միության նախագահ, Հայաստանի պարալիմպիկ կոմիտեի նախագահ Հակոբ Աբրահամյանը լրագրողներին ասաց. «Այս պարալիմպիկ խաղերը նախորդներից առանձնանում են մասնակիցների անհամեմատ մեծ քանակով: 160 երկրների շուրջ 4200 ներկայացուցիչներ են պայքարելու մեդալների համար: Մարգարիտան խաղերին մասնակցելու իրավունք նվաճել է Ցինցինատիում անցկացված վարկանիշային մրցաշարում: Նա հանդես է գալու բրաս լողաոճով 100 մետր մրցատարածությունում: Իսկ 48 կգ քաշային Գրետան մեկնելու սպիտակ քարտով եւ մասնակցելու է պառկած դիրքից հրում մրցաձեւին»:
Աշոտ ՀԱԿՈԲՅԱՆ
