Երեկ փորձել ենք զրուցել Աժ պատգամավոր Ռուբեն Հայրապետյանին պատկանող «Հարսնաքար» ռեստորանային համալիրում հունիսի 17-ին սպանված Վահե Ավետյանի հոր՝ Գառնիկ Ավետյանի հետ։ Զրույցը կարճ տեւեց։ Վահեի հայրը հուզված էր եւ չկարողացավ երկար խոսել։
– Պարոն Ավետյան, նախաքննության ընթացքը ձեզ բավարարո՞ւմ է։
– Ոչ։
– Ինչո՞ւ ոչ։
Կարդացեք նաև
– Որովհետեւ նախաքննությունը ավարտված է, բայց մեղավորներ չկան դեռ։
– Երկու շաբաթ առաջ մի քանի մտավորականներ հայտարարությամբ հանդես եկան, որով խնդրում էին Ռուբեն Հայրապետյանին՝ մանդատը վայր չդնել, ինչպե՞ս եք վերաբերվում այդ հայտարարությանը։
– Ինձ բոլորովին հետաքրքիր չէ՝ մանդատը կդնի-չի դնի, բոլորովին չի հետաքրքրում։
– Մտավորականների հայտարարությանը ինչպե՞ս եք վերաբերվում։
– Բայց ունե՞նք մենք մտավորականներ։ Չգիտեմ… չէ…
– Վահեի փաստաբանները միջնորդել էին, որպեսզի Ռուբեն Հայրապետյանին գործում որպես կասկածյալ ներգրավեն, այնինչ այդ միջնորդությանը դեռեւս պատասխան չկա։ Դուք է՞լ եք այդ կարծիքին, որ Հայրապետյանը պետք է որպես կասկածյալ ներգրավվի։
– Դա ես չպետք է ասեմ։ Նախաքննությունը պետք է ասի եւ փաստաբանները։ Եթե ասում են, ուրեմն՝ հիմք ունեն։
– Իրենք նաեւ ասում էին, որ Ռուբեն Հայրապետյանի հարցաքննությունը ձեւական բնույթ է կրել, ինչից նոր հարցեր են առաջացել։ Դուք է՞լ եք կարծում, որ ձեւական բնույթ է կրել։
– Բայց ո՞վ այդ կարծիքին չէ։
– Խոսակցություններ կային, որ Վահեի երեխաներին ցանկանում եք երկրից տանել, սա նշանակո՞ւմ է, որ ցանկություն ունեք ընտանիքով լքել Հայաստանը։
– Ո՞վ Է ասում։
– Սոցիալական ցանցերում նման խոսակցություններ կային։ Այսինքն՝ հիմնավոր չե՞ն այդ խոսակցությունները։
– Ես տղայիս գերեզման ունեմ այստեղ։ Լավ, կներեք (հուզվում է), չեմ կարողանում շարունակել։
– Հնարավո՞ր է, դիմեք Սերժ Սարգսյանին, որ իր վերահսկողության տակ առնի այդ գործը, ու արդար քննություն գնա։
– Ոչ, ոչ, ինքը տեղյակ է, եթե ցանկանար, դա կաներ։
– Դուք ի՞նչ եք կարծում, կլինի՞ արդար քննություն, թե՞ ոչ, մեղավորները կպատժվե՞ն։
– Ոչ։ Կներեք։
Լուսինե ԲԱՐՍԵՂՅԱՆ
«Հայկական ժամանակ»
