Կենտրոն և Նորք-Մարաշ համայնքների ընդհանուր իրավասության դատարանը օգոստոսի 18-ին մերժեց «Սիվիլիթաս» հիմնադրամի հայցը, որով այն պահանջում էր վերացնել Ազգային անվտանգության ծառայության կողմից խոշոր չափի փողերի լվացման հատկանիշներով 25.05.2012թ. հարուցված քրեական գործը: Ուստի Aravot.am-ը գործի մանրամասներին ծանոթանալու և մեկնաբանություններ ստանալու համար զրուցեց «Սիվիլիթաս» հիմնադրամի տնօրեն Սալբի Ղազարյանի հետ: Նա նշեց. «Թերևս հայցի մերժման պատճառը հարցնեք ԱԱԾ-ի քննիչներից: Պարզ էր, որ հայցը փոխված է, այնտեղ ոչ մի խոսք չկար կեղտոտ փողերի և փողերի լվացման որոշման մասին, այնինչ որոշումը հենց դրա շուրջ էր: Փոխարենը կար ուրիշ ուղղվածություն.այս գործի միջոցով ԱԱԾ-ն պաշտպանում է նաև Սիվիլիթասի շահերը: Սակայն անընդունելի է այն, որ ԱԱԾ-ն իր վրա պիտի վերցներ ցանկացած ՀԿ-ի գործունեության նկատմամբ շահի, մեղքի, պարտավորության հաշվետվության և այլ պարտականությունը: Անընդունելի է այնպիսի մոտեցումը, երբ պնդում ես մեղավորության մասին, հետո ոչ մի բան չես ասում, այլ ընդհակառակը, վերածում ես ուրիշ բանի՝ պատճառաբանելով, թե մենք ուզում ենք Սիվիլիթասի շահերը պաշտպանենք: Դա արդեն լուրջ չէ, ոչ քրեական է, այլ քաղաքական»: Հետաքրքրվեցինք՝ Ս. Ղազարյանն ունի՞ այն հարցի պատասխանը, թե ինչու «Սիվիլիթասի» նկատմամբ վերաբերմունքը հանկարծ փոխվեց: Մեր զրուցակիցը պատասխանեց. «Պատասխանը սա է. այստեղ չկան կեղտոտ փողեր, չկա փողերի լվացում»:
Ս. Ղազարյանը տեղեկացրեց, որ իրենք բողոքարկելու են Վերաքննիչ դատարան՝ օրենքի սահմաններում:
Տաթև ՀԱՐՈՒԹՅՈՒՆՅԱՆ
