Հայաստանը 57 միլիոն դրամի հումանիտար օգնություն է ցուցաբերել օգոստոսի 11-ին Իրանում տեղի ունեցած երկրաշարժից տուժած բնակչությանը: Այսօր ՀՀ կառավարության մամուլի կենտրոնում արտակարգ իրավիճակների նախարար Արմեն Երիցյանը մեկ առ մեկ թվեց, թե ինչ ենք ուղարկել իրանցիներին. «26 հազար տուփ պահածո, վրաններ, խմելու ջուր, ծածկոցներ, քնապարկ, բացովի մահճակալ եւ այլն»:
Հայկական կողմը իրանցիներին փրկարարական ծառայություն էլ է առաջարկել, բայց Իրանը հրաժարվել է` ասելով, որ իրենց ուժերը բավարար են:
Լրագրողներից մեկի այն դիտարկմանը, թե Իրանի երկրաշարժից տուժել էր նաեւ Սյունիքի մարզի Վարհավար գյուղը, որտեղ անգամ տներ են վնասվել եւ բնակիչները վախից մեկ շաբաթ դրսում են գիշերել, պարոն Երիցյանն ասաց. «Այդտեղ երկրաշարժի ուժգնությունը եղել է 5,5 բալ եւ քարաթափումներ են եղել: Մենք տեղյակ ենք եւ այդ մասին տեղյակ ենք պահել կառավարությանը»:
Պարոն Երիցյանի խոսքերով, թեեւ մի շարք չափանիշներով մեր փրկարարական ծառայությունը առաջատարներից մեկն է տարածաշրջանում, բայց սեյսմիկ ծառայությունում դեռեւս անելիքներ կան:
Չնայած փրկարարների ծանր եւ դժվարին աշխատանքին, փրկարարները պարբերաբար դժգոհում են իրենց ցածր աշխատավարձերից: Aravot.am-ը նախարարից հետաքրքրվեց, թե երբեւէ նման հարց բարձրացրե՞ լ է կառավարությունում: Ի պատասխան, Արմեն Երիցյանը նկատեց. «Իմ աշխատավարձն էլ է ցածր, ստանում եմ 240 հազար դրամ: Ինչ վերաբերում է աշխատավարձերին, ապա վարչապետն այդ ուղղությամբ լուրջ աշխատանքներ է տանում»:
Կարդացեք նաև
Լուսինե ԲՈՒԴԱՂՅԱՆ
