Երեկ ուշ երեկոյան ժամը 22:30-ի սահմաններում փրկարարարներին հաջողվեց Սյունիքի մարզի Դավիթբեկի ջրամբարից դուրս հանել Կապանի Ձորք թաղամասի բնակիչ Մհեր Հայրապետյանի «ՎԱԶ 2106» մակնիշի ավտոմեքենան, որը ջուրն էր սուզվել օգոստոսի 11-ի կեսգիշերին: Ջրամբարից կամ տեղացիներին առավել հայտնի Չայզամի լճից մեքենայի դուրսբերման աշխատաքները 2 օր են տեւել: Մեքենան 13 մ խորության վրա էր գտնվում, ծառերի ճյուղերի ու քարերի արանքում եւ ափից 25 մ հեռավորության վրա, ինչն էլ դժվարացնում էր փրկարարների աշխատանքը: Ըստ Սյունիքի մարզային փրկարարական ծառայության պետ Արթուր Հարությունյանի` տեղի փրկարարները տվյալ պայմաններում աշխատելու համար հանդերձանք չունեին, ուստի ջրասուզված մեքենայի դուրսբերմանը աջակցել են Սեւանի 3 փրկարարներ եւ տեխնիկայի միջոցով մեքենան հանվել է ջրից ու հանձնվել տիրոջը:
Ինչպես տեղեկացրել էինք հետեւյալ հրապարակմամբ` դեպքը եղել է օգոստոսի 11-ի կեսգիշերի սահմաններում, երբ Կապանի Ձորք թաղամասի բնակիչ Մհեր Հայրապետյանը իր 25-ամյակը նշելուց հետո ընկերների հետ ցանկացել է լողալ լճում եւ մեքենան կանգնեցրել է լճից 10-15 մ բարձրության վրա գտնվող բացատում: Սակայն մեքենան այնտեղից գլորվել է դեպի ջուրը եւ սուզվել: Մեքենայում մարդ չի եղել եւ տուժածներ չկան:
Մերի ՍՈՂՈՄՈՆՅԱՆ
