«Ռաֆայէլ Քեռիս» ֆիլմը, որուն կեդրոնական կերպարը հիմնուած է լոս-անճելըսահայ ծանօթ բեմադրիչ եւ դերասան Վահիկ Փիրհամզէյի ստեղծած կերպարին վրայ, պիտի ցուցադրուի Լոս Անճելըսի, Նիւ Եորքի, Ֆրեզնոյի, Թորոնթոյի եւ շարք մը այլ քաղաքներու մէջ Սեպտեմբեր 21էն սկսեալ:
Առաջին անգամ ըլլալով Հոլիվուտի մէջ պատրաստուած կատակերգական ֆիլմի մը կեդրոնական կերպարը հայ մըն է, իսկ ֆիլմը գեղեցիկ երկխօսութիւն մը կը ստեղծէ հայկական եւ ամերիկեան մշակոյթներուն միջեւ:
Ֆիլմին կեդրոնական կերպարը կը մարմնաւորէ նոյնինքն Փիրհամզէյ, իսկ մնացեալ կերպարները կը մարմնաւորեն ամերիկացի հանրածանօթ դերասաններ, ինչպիսիք են՝ Միսսի Փայլ (The Artist), Ճան Մայքըլ Հիկինզ (Yes Man), Ռէյչըլ Պլանչարդ (Road Trip) եւ ուրիշներ:
Փիրհամզէյ, որ տասնեակ անգամներ բեմ բարձրացած է Ռաֆայէլ քեռիի կերպարով, կը բացատրէ, թէ պատմութիւնը կը դառնայ ամերիկացի ընտանիքի մը շուրջ, որ ընտանեկան լուրջ տագնապի մը մէջ է եւ պատկերասփիւռի յայտագիրի մը միջոցաւ պէտք է բնակութեան համար տուն հրաւիրէ տարեց հայ մը (Ռաֆայէլ քեռին), որ միայն մէկ շաբաթ ունի ընտանիքը փրկելու:
Առաջին տեսարանէն մինչեւ վերջին տեսարանը, ֆիլմը կը պահէ իր «հիւմըր»ն ու թեթեւութիւնը, եւ Ռաֆայէլ քեռիի կերպարին տարիներու փորձառութիւնն ու փողոցի իմաստութիւնը համամարդկային գրաւիչ խորք մը կու տան գործին՝ պատճառ դառնալով, որ փոքրամասնութեան մը պատկանող անձը նոյնութիւն մը գտնէ կեդրոնական կերպարին հետ:
Բեմադրիչը՝ Մարք Ֆուսքօ, որ նախապէս զանազան առիթներով աշխատած է Սփիլպըրկի հետ, կը յայտնէ, թէ Միացեալ Նահանգներ գաղթականներէ բաղկացած երկիր մը ըլլալով՝ «բոլորս ալ ճանչցած ենք Ռաֆայէլ քեռի մը մեր կեանքերուն մէջ, եւ հաւանաբար նոյնիսկ իրենցմէ սորված ենք: Այս պարագային՝ այդ մարդը հայ մըն է եւ իր ներկայութիւնը դրական դեր կը խաղայ ընտանիքի մը պահպանման մէջ»:
«Կասկած չունենք, որ մեր գաղութը պիտի քաջալերէ էս ֆիլմը՝ իր ներկայութիւնը ցոյց տալով, որովհետեւ սա կարեւոր երեւոյթ է ոչ միայն մեզ համար, այլ՝ Հոլիվուտի ֆիլմի ճարտարարուեստին փաստելու համար, թէ հայերի հետ գործ ունենալը դրական փորձառութիւն մըն է լինելու՝ բոլոր անկիւններից դիտուած», կ՛ըսէ Փիրհամզէյ:
Յաւելեալ տեղեկութիւններու համար, կարելի է դիմել հետեւեալ հասցէին. [email protected], կամ այցելել www.myunclerafael.com կայքը:
