Aravot.am –ը այս հարցը ուղղեց ԱՄՆ-ում քաղաքական ապաստան ստացած, Գյումրու քաղաքապետի գլենդելաբնակ թեկնածու Սպարտակ Պետրոսյանին, ինչին ի պատասխան Լենինականի Շիրակի շրջկոմի առաջին քարտուղարն ասաց. «Ես շատ-շատերի հետ եմ զրուցել այնտեղ , նրանց մեծ մասը ցանկություններ ունեն քաղաք վերադառնալ, մի մասը լավ է այնտեղ իրեն դրսևորել, ֆինանսապես իրենց լավ են զգում, առաջխաղացումներ ունեն և շատերի մոտ կա այդպիսի ձգտում` վերադառնալ քաղաք: Թե ինչպե՞ս կլինի հետագայում, դժվար է ասել, բայց էդ ձգտումը շատերի մոտ ես նկատել եմ, եթե լիարժեքորեն էլ չվերադառնա, ապա մի մասը , ես զրույցների ընթացքում ճշտել եմ, կուզենար գոնե էստեղ բիզնես դնել, օբյեկտներ դնել, ինչ-որ մի կետ ունենալ, որպեսզի կապ հաստատի հայրենիքի հետ, չկտրվի»:
Քաղաքապետի թեկնածուն նաև ասում է , որ դրսում շատ բողոքներ է լսում այն մասին, թե Հայաստանում ներդրողներ կատարողը պրոբլեմների մեջ է ընկնում: «Ես չգիտեմ, թե դա որքանով է ճիշտ, բայց ասում են Հայաստանում տոկոսային հարաբերությունների հարց է առաջանում ներդրողների համար`10, 20 , նույնիսկ ասում են որոշ դեպքերում 50 տոկոս պայման են դնում, որ մասնակցեն այդ բիզնեսին: Ես գտնում եմ, որ կոնկրետ Գյումրի քաղաքում, ավերված այս քաղաքում չի կարելի նման փորձություններ անել: Ցանկացած ներդրողի համար պետք է ճանապարհ բացել, ոչ թե մենք ճանապարհ պետք է բացենք, այլ պետք է խնդրենք, աղաչենք, որպեսզի մարդիկ կան ներդրումներ անեն քաղաքի զարգացման համար»,- ասում է Սպարտակ Պավլովիչը:
