Այսօր «Հայելի» ակումբի հյուրն էր Մոսկվայի միջազգային բազմամշակութային դպրոցի տնօրեն Օֆելյա Առաքելյանը, ով ներկայացրեց դպրոցն ու կրթական ծրագրերը:
Տիկին Առաքելյանը փաստեց, որ 1989թ-ին հիմնադրված դպրոցը միակ ազգային կրթական-կենտրոնն էր Մոսկվայում: Դպրոցի բացման անհրաժեշտությունը կապված էր այն երեխաների հոգեբանական վերականգնման անհրաժեշտության հետ, որոնք երկրաշարժից հետ տեղափոխվել էին Մոսկվա: «Հիվանդանոցներից մեկում մի հայ երեխա անշարժ վիճակում պառկած էր: Նրա մայրը ձեռքը դրեց ուսիս և մտահոգություն հայտնեց երեխայի հետագա ուսուցման հարցով: Սիրտս լցվեց, հուզվեցի և որոշեցի զբաղվել խնդրով: Դիմեցի դեսպատանուն, որի վրացի ներկայացուցիչներից մեկը Մոսկվայից քիչ հեռու գտնվող վերականգնողական կենտրոնի առաջին հարկը տրամադրեց դպրոց բացելուն»,-պատմեց Օֆելյա Առաքելյանը` հավելելով, որ դպրոցը, իրապես, ժամանակի ընթացքում նպաստեց հայ երեխաների հոգեբանական վերականգնմանը:
Ներկայումս Կրեմլի հարևանությամբ գտնվող կրթօջախում սովորում են 15 ազգության երեխաներ: Տիկին Առաքելյանն ասաց, որ դպրոցն ոնի շուրջ 200 աշակերտ, որից 100-ը հայ է: «Դպրոցն այժմ ամենօրյա է և անվճար, իսկ 2000թ-ից ունեցել ենք առաջին դասարաններ: Հայերենը դասավանդվում է Երևանի կրթական ծրագրով, սակայն Հայաստանում պարբերաբար վերապատրաստվող ուսուցիչները նույնպես ծրագրեր են կազմում` աշակերտների ընդունակություններին համապատասխան»:
Դպրոցի խնդիրներից տնօրենն առանձնացրեց հայերենին հատկացվող ժամերի սակավությունը` շաբաթական 2 ժամ. «Ունենք աշակերտ, որի հայրը հայ է, մայրը` ռուս: Կինը եկել և դժգոհում էր, որ երեխան հայերեն լավ չգիտի, մինչդեռ ինքը ցանկանում էր, որ աշակերտը լավ տիրապետի հայերենին»:
