Լրագրողներ առանց սահմանների կազմակերպությունը, որի կենտրոնակայանը գտնվում է Փարիզում, Սիրիայի ընդդիմությունից պահանջում է վերջ տալ լրագրողների վրա կատարվող հարձակումները:
Երեքշաբթի օրը միջազգային լրագրողական հեղինակավոր կազմակերպությունը բաց նամակ է հղել Սիրիական ազգային խորհրդի նախագահ Ռիյադ ալ-Ասադին, «Ազատ Սիրիա» բանակի ղեկավար Աբդել Բասեթ Սայդային, ինչպես նաեւ Սիրիայի բարեկամներ խմբին: Նամակում «Լրագրողներ առանց սահմանների» կազմակերպությունը խորը մտահոգություն է հայտնում սիրիացի լրագրողների դեմ աճող բռնությունների կապակցությամբ, ներառյալ` պետական եւ կառավարամետ լրագրողների նկատմամբ:
«Մեր կազմակերպությունը վերջին շաբաթներին արձանագրել է տեղեկատվության ազատության դեմ բռնությունների դեպքեր, որ արվել հակակառավարական ուժերի կողմից: Սիրիայի իշխանամետ լրագրողները հաճախ են թիրախ դառնում, առեւանգվում կամ սպանվում», – նշված է նամակում:
Կազմակերպության նախագահ Քրիստոֆ Դելուայի ստորագրած նամակում հիշատակվում են մի շարք կոնկրետ դեպքեր:
Կարդացեք նաև
«Օգոստոսի 3-ին իսլամիստական «Ալ-Նոսրա» խմբավորումը հայտնեց, որ սպանել է հեռուստաընկերության հաղորդավար Մոհամադ ալ-Սաիդին, ում իր տնից առեւանգել էին հուլիսի կեսերին: Օգոստոսի 10-ին «Ազատ Սիրիա» բանակի կողմից առեւանգվել են իշխանության հիմնադրած մասնավոր «Ալ-Իխբարիա» մասնավոր հեռուստաընկերության մի խումբ աշխատակիցներ: Ըստ հասանելի տեղեկատվության, առեւանգվածներից մեկը մահացել է», – նշված է նամակում, որտեղ այլ դեպեր եւս թվարկված են:
Նամակում նաեւ նշված է, որ օտարերկրյա մի շարք լրագրողներ ասել են, որ ընդդիմադիր ուժերի կողմից մահվան սպառնալիքներ են ստացել, ոմանք առեւանգվել են ջիհադական փոքր խմբավորումների կողմից:
«Այսպիսի պրակտիկան ցավալիորեն հիշեցնում է Ասադի ռեժիմի գործողությունները ընդդիմադիր լրագրողների դեմ», – նշում է «Լրագրողներ առանց սահմանների» կազմակերպությունը:
Նամակում Սիրիայի ընդդիմության հիմնական ներկայացուցիչներին կոչ է արվում հրապարակավ դատապարտել այս բռնությունները եւ անհրաժեշտ հետաքննություն անցկացնել:
«Սիրայի ազատ բանակը եւ ընդդիմության մյուս խմբերը պետք է անհապաղ եւ առանց նախապայմանների ազատ արձակեն լրագրողներին եւ լրատվամիջոցների աշխատակիցներին», – կոչ է անում կազմակերպությունը:
Այն նաեւ պահանջում է անհապաղ դադարեցնել ստիպողաբար հայտարարությունների նկարահանումները, որ արվում են արժանապատվությունը ոտնահարող գործելաոճով:
Հավելենք, որ նույն օրը, օգոստոսի 14-ին արաբերեն հեռարձակվող «Ալ-Ալամ» իրանական հեռուստաընկերությունը հայտնեց, որ զինյալ ահաբեկչական խմբերը Հոմս քաղաքում տուն վերադառնալիս առեւանգել են հեռուստաընկերության լրագրող Ահմադ Սաթուֆին: Սա Սիրիայում օտարերկրյա լրագրողի անհետացման մասին առաջին հաղորդագրությունն է:
Հրաչ ՄԵԼՔՈՒՄՅԱՆ
«Ազատություն» ռադիոկայան
