ՏԻՄ ընտրությունների թեկնածուների առաջադրման գործընթացի արդյունքում պարզ դարձավ, որ ինչպես Շիրակի, այնպես էլ մյուս մարզերում համայնքապետի և ավագանու անդամության թեկնածուների մեծ մասը Հանրապետական և Բարգավաճ Հայաստան կուսակցության անդամներ են, կամ անկուսակցականներ: Պասիվ կեցվածք են ընդունել ինչպես ընդդիմադիր ՀԱԿ-ն ու Ժառանգությունը, այնպես էլ Օրինաց երկիր կուսակցությունը:
Շիրակի մարզում Կոնգրեսի տեղի գրասենյակի պատասխանատուների վստահեցմամբ՝ քաղաքական ուժի ներկայացվածությունը ՏԻՄ ընտրություններում կազմում է մոտ 25 տոկոս: Ունեն գյուղապետի 15 թեկնածու, որոշ դեպքերում կոնգրեսականները պաշտպանելու են անկուսակցական կամ քաղաքական այլ ուժերի ներկայացուցիչների թեկնածությունը:
Ավագանու անդամության 3 թեկնածուի են առաջադրել: Ի՞նչ պատճառով է ՀԱԿ-ը պասիվություն դրսևորում. ֆինանսական խնդիրներ կան, թե տեղի ուժերն են ոչ բավարար: Ըստ կոնգրեսական գործիչների՝ ՀԱԿ-ը գնում է ոչ թե քանակական, այլ գաղափարական պայքարի:
Օրինաց երկիր կուսակցության տեղի կառույցն իր թեկնածուներին առաջադրել է Շիրակի մարզի 7 համայնքներում: Դրանք այն գյուղերն են, որտեղ գյուղապետի պաշտոնի համար մրցակցություն չկա, և ՕԵԿ-ի առաջադրած թեկնածուները հաղթելու հնարավորություն ունեն:
Կարդացեք նաև
Պասիվություն այս ընտրություններում ցուցաբերեց նաև Ժառանգություն կուսակցությունը: Նախ նշվում էր, որ հատկապես Շիրակի մարզում, որտեղ կուսակցությունը ԱԺ ընտրություններին գոհացնող ձայներ էր հավաքել, ՏԻՄ ընտրություններին ակտիվ մասնակցություն է ունենալու, խոսվեց անգամ Գյումրու քաղաքապետի թեկնածուի առաջադրման մասին, սակայն որոշում այդպես էլ չեղավ: Մեկ հարցում, սակայն, քաղաքական երեք ուժերի ներկայացուցիչներն էլ նույն համոզմանն են, որ ՏԻՄ ընտրություններում իրական պայքար որպես այդպիսին գոյություն չունի, և վաղուց է, ինչ կեղծիքն ու անարդարությունը թափանցել են նաև այդ համակարգ:
«Ժամանակ»
