Արտակ Նազարյանի մահվան գործով դատավարության օգոստոսի 14-ի նիստում շարունակեց ցուցմունք տալ տուժողի իրավահաջորդ Ծովինար Նազարյանը: Նա անդրադարձավ քրեական գործով նախկին քննիչ Սարգիս Մադաթյանի «հերոսություններին», թե ինչպես նա, իրենց տուն գալով, ամեն կերպ խուսափել է պատասխանել այն հարցին, թե իրենք ո՞ր ժամին են հասել հենակետ` դեպքի վայր:
Ծովինար Նազարյանն ասաց, որ Արտակի մարմինը շատ վատ վիճակում էր, այն իրենց աչքի առաջ ուռում եւ քայքայվում էր, իրենց ասել էին, թե բժիշկն արգելել է մարմնին ձեռք տալ, որ հպումից կարող է հանգուցյալի մաշկը պոկվել: Ծովինարի վկայությամբ`Արտակի ձեռքերը դագաղի մեջ ամրակներով ամրացված էին, որ իրենք պոկել են դրանք եւ տեսել, որ նրա ձեռքերը չորացել են: Ծովինար Նազարյանի խոսքերով` դա վկայում է, որ Ա. Նազարյանի սպանությունն ավելի վաղ է տեղի ունեցել, գործով քննիչները դեպքի վայր իրենց ժամանման տարբեր ժամեր են նշել, որպեսզի քրեական գործը կոծկեն: Քննիչ Մադաթյանը Նազարյանների տանն ասել է, որ դեպքի զննության ժամանակ ինքը ձեռնոցներ չի տարել, որ իր մատնահետքերն են Արտակի ինքնաձիգի վրա, մինչդեռ այժմ ինքնաձիգի վրա մատնահետք չկա: Ծովինար Նազարյանն ասաց, որ Արտակն իր հորը` Սինար Նազարյանին ասել է` «զամպալիտն ու գումարտակի հրամանատարը ետեւիցս են ընկել»:
Տուժողի իրավահաջորդը դատարանում հայտարարեց, որ 2010թ. օգոստոսին քննիչ Ս. Մադաթյանն իրենց հրավիրել է ծանոթանալու գործով նշանակված փորձաքննության արդյունքներին, որ այն ժամանակ Արտակի գլխարկի վրա արյան հետքեր չկային: Սակայն մի տարի անց գործով նոր քննիչ Լեւոն Պետրոսյանը Նազարյանին հանձնել է նախաքննության նյութերը, որտեղ լուսանկարում Արտակի գլխարկն արյունոտ է: Ծովինար Նազարյանը համոզմունք հայտնեց, իր եղբոր սպանությունն այլ տեղ է կատարվել, դրանից հետո դիակը տեղափոխվել է ժայռաբեկորի մոտ, Արտակը չէր կարող բազմաթիվ վնասվածքներով բարձրանալ 300մ` ժայռաբեկորի մոտ:
Ծովինարն անդրադարձավ գրությանը, ուր Արտակ Նազարյանն իբր գրել է ինքնասպանություն կատարելու պատճառների մասին: Ծովինարը հայտարարեց, որ դա Արտակը չի գրել, ձեռագիրը նմանեցված է, Արտակը չէր կարող «դաստիարակություն» բառը գրել առանց «ա»-ի` «դաստիրակություն»: Բնութագրելով եղբոր մարդկային կերպարը` Ծովինարն ասաց, որ նա երբեք կաշառք չէր վերցնի եւ կաշառք չէր տա, որ կամքով ուժեղ էր:
Կարդացեք նաև
Պատասխանելով դատավարության մասնակիցների հարցերին` Ծ. Նազարյանն ասաց, որ եղբայրը ոգելից խմիչքներ չէր օգտագործում, նա մանուկ հասակում դեղնախտ էր տարել, հավատացյալ լինելով` Արտակը սթրեսը կհաղթահարեր աղոթելով: Նշենք, որ դատաբժշկական փորձաքննությամբ` Արտակի արյան մեջ ալկոհոլ է հայտնաբերվել:
Արտակ Նազարյանի մայրը` Հասմիկ Հովհաննիսյանը, որպես վկա ցուցմունք տալով, ասաց, որ Արտակը զինվորներին շատ էր սիրում, նա իրենից պատմության դասագրքեր եւ քարտեզներ է խնդրել, որպեսզի զինվորներին սովորեցնի հայոց պատմություն: Մոր խոսքերով` եթե Արտակը կամենար ինքնասպան լինել, կկանգներ ժայռաբեկորի մոտ եւ իսկույն կխոցվեր ադրբեջանական հենակետերի կրակից: Հասմիկ Հովհաննիսյանի համոզմամբ` Արտակին սպանողները 3 կամ 4 հոգի են եղել, այդ գործում իրական մեղավորները դատարանի դահլիճում չեն: Տիկին Հասմիկը նրանց թվում նշեց վաշտի հրամանատար Գագիկ Ուդումյանի եւ գումարտակի հրամանատար Միշա Գաբրիելյանի անունները: «Լռեք ու գնացեք Ուդումյանի եւ Միշա Գաբրիելյանի փոխարեն նստեք»,-ամբաստանյալ զինծառայողներին ասաց Հասմիկ Հովհաննիսյանը:
Ոսկան ՍԱՐԳՍՅԱՆ
