Հունիսի 17-ին «Հարսնաքար» ռեստորանային համալիրում դաժան հաշվեհարդարի հետևանքով ՀՀ ՊՆ Կենտրոնական զինվորական կլինիկական հոսպիտալի բաժանմունքի պետ, մայոր Վահե Ավետյանի սպանության կապակցությամբ, ՀՀ ԱԺ «Ժառանգություն», ՀԱԿ և Հ.Յ. Դաշնակցություն խմբակցությունները կազմեցին 9 կետից բաղկացած հարցաշար և հուլիսի 23-ին ուղարկեցին ՀՀ դատախազություն և ՀՀ կառավարություն: Հարցաշարում մասնավորապես հարցեր էին բարձրացվում այն մասին, թե արդյոք հայտնի՞ են «Հարսնաքար»-ում տեղի ունեցած միջադեպի բոլոր մասնակիցները, կա՞ն դեպքի այլ ականատեսներ, որոնք դեռ հարցաքննված չեն, կամ ո՞ւմ հրահանգով են ծեծի ենթարկվել Վահե Ավետյանը և մյուսները, մեղադրյալններից ո՞վ կամ ովքե՞ր են առավել ակտիվ եղել ծեծի ժամանակ և այլն: Հարցաշարի կազմման ընթացքում քննարկումները թեժացան, այնուհետև մարեցին: Ուստի Aravot.am-ը փորձեց պարզել, գործն ի՞նչ ընթացք ստացավ: Կապվեցինք ՀՀ դատախազի մամուլի քարտուղար Սոնա Տռուզյանի հետ:
Նա մեզ տեղեկացրեց, որ 01.08.2012-ին ՀՀ դատախազությունից պաշտոնական պատասխան է ուղարկվել այն պատգամավորներին, ովքեր ստորագրել էին հարցաշարի տակ: Ս. Տռուզյանը չցանկացավ խոսել պատասխանի բովանդակության մասին՝ նշելով, որ այդ տեղեկատվության տնօրինողը այն երեք պատգամավորներն են, ում ստորագրությամբ իրենք ստացել են հարցաշարը:
Տեղեկացնենք, որ հարցաշարի տակ ստորագրել էին «Ժառանգություն» խմբակցությունից Ռուբեն Հակոբյանը, ՀԱԿ-ից Արամ Մանուկյանը և Հ.Յ. Դաշնակցությունից՝ Արմեն Ռուստամյանը: Այս պատգամավորների մեկնաբանությունները կներկայացնենք շուտով:
Տաթև ՀԱՐՈՒԹՅՈՒՆՅԱՆ
