Քաղաքական շրջանակներում խոսվում է նաեւ, որ նոր ուժ է պատրաստվում ձեւավորել վերջերս Հայ ազգային կոնգրեսը լքելու մասին պաշտոնապես հայտարարած Դավիթ Շահնազարյանը, որը, ըստ կայքերից մեկի տեղեկությունների, Խաչատուր Քոքոբելյանի եւ Կոնգրեսը լքած մեկ այլ գործչի՝ «Հանրապետություն» կուսակցության առաջնորդ Արամ Սարգսյանի հետ գտնվում է ԱՄՆ-ում։ Երեկ, սակայն, մեզ հետ զրույցում Արամ Սարգսյանն ասաց, որ ինքը Հայաստանում է, դեռ ԱՄՆ չի մեկնել, նոր է մեկնելու, իսկ թե՝ որ օրը, չհստակեցրեց, ասաց ընդամենը, որ Արարատ Զուրաբյանի եւ Դավիթ Շահնազարյանի հետ որեւէ հանդիպում նախատեսված չէ։ «Որեւէ պայմանավորվածություն կամ արտաքին քաղաքական ուղղվածության որեւէ խնդիր գոյություն չունի ոչ «Ազատ դեմոկրատների», ոչ Դավիթ Շահնազարյանի հետ, առավել եւս, որ ես նրանց հետ երեք ամիս է չեմ հանդիպել։ Մենք հակված ենք քաղաքական դաշտում համագործակցել բոլոր այն ուժերի հետ, ովքեր ռեալ փոփոխություն են ուզում, ովքեր թափանցիկ են հասարակական, քաղաքական դաշտում, այդ առումով որեւէ խնդիր չունենք տվյալ ուժերի եւ անհատների հետ, բայց որեւէ պայմանավորվածություն, որեւէ հանդիպում առ այսօր չկա»,- ասաց Արամ Սարգսյանը։
Ի դեպ, տեղեկություններ կան նաեւ այն մասին, որ Արամ Սարգսյանը եւս մտադիր է նոր ուժ ձեւավորել։ Հայ ազգային կոնգրեսը լքելուց հետո «Հանրապետություն» կուսակցությունում եւս որոշակի խմորումներ են ընթանում։ Մասնավորապես խոսվում է Արամ Սարգսյանի եւ Սմբատ Այվազյանի հակասությունների մասին։ Մեր զրույցում, սակայն, նոր ուժ ձեւավորելու մասին խոսակցությունների վերաբերյալ Արամ Սարգսյանն ասաց, թե նման բան չկա։ «Մենք կուսակցության համագումարին ենք նախապատրաստվում։ Այն տեղի կունենա սեպտեմբերի վերջին, հոկտեմբերի սկզբին։ Հանդիպումներ են տեղի ունենալու հանրապետության մարզերում, որտեղ կառույցներ ունենք, եւ համագումարի մանդատներ են տրվելու: Ինչ վերաբերում է Սմբատ Այվազյանին, նա գերադասում է հասարակական գործունեությամբ զբաղվել, նրա որոշումն է, ես մեկնաբանություն չունեմ»,- ասաց Արամ Սարգսյանը։
Լուսինե ԲԱՐՍԵՂՅԱՆ
«Հայկական ժամանակ»
