Կենտրոն եւ Նորք-Մարաշ վարչական շրջանների ընդհանուր իրավասության դատարանում Մխիթար Պապոյանի նախագահությամբ օգոստոսի 14-ին նշանակվել էր «Մոսկվա» կինոթատրոնի գողության գործով կալանավորված Ստեփան Հովակիմյանի եւ Վահրամ Քերոբյանի դեմ հարուցված քրեական գործով դատական նիստը:
Այսօր Ստեփան Հովակիմյանի հայրը՝ Բենիամին Հովակիմյանը Aravot.am-ին հայտնեց, թե դատարանից իրեն փոխանցել են, որ դատական հաջորդ նիստը նշանակվել է օգոստոսի 17-ին:
Բենիամին Հովակիմյանը նաեւ տեղեկացրեց, որ հեռախոսով 2 օր առաջ զրուցել է որդու՝ Ստեփանի հետ: Նա ասել է, որ պատրաստ է ներողություն խնդրել դատարանից, դատախազ Սամվել Հարությունյանից, պաշտպանից՝ Տիգրան Սաֆարյանից, «որն ամբողջովին արյունոտվել էր», եւ հասարակությունից՝ դատական նիստերի դահլիճում ինքնավնասումից հետո իրեն չտիրապետելու համար:
Ստեփան Հովակիմյանը նաեւ հայտնել է, որ հանկարծակի է եկել նոր վկայի հայտնվելուց, քանի որ 2,5 տարվա դատաքննությունից հետո ինքը սպասում էր դատախազի ճառին: «Նա որեւէ մեկին խփելու ցանկություն չի ունեցել, անակնկալ էր, որ խփել է դատախազին», -ասում է ՌԴ-ից մի քանի օր առաջ վերադարձած Բենիամին Հովակիմյանը:
Կարդացեք նաև
Ստեփանի եղբայրը նախորդ ուրբաթ տեսակցել է նրա հետ: Ստեփանի թեւին առկա է եղել 8-9 կտրվածք, ըստ եղբոր՝ Ստեփանը ընկճված ու տխուր էր:
Կար չի եղել: Չի ասել, թե դատարանում ինչով է ինքնավնասել իրեն:
Ռուզան ՄԻՆԱՍՅԱՆ
