Այսօր ժամը 16:24 րոպեի սահմաններում Կապանում երկրաշարժ է զգացվել: Ուժեղ ցնցվել են շենքերը, որից խուճապահար եղած մարդիկ բնակարաններից դուրս են եկել եւ երկրորդ ցնցումը, որն ավելի ուժգին է եղել, 10 րոպե անց զգացել դրսում: Կապանում այս պահին շենքերի բակերը լիքն են մարդկանցով, նույնիսկ հիվանդանոցների հիվանդներն են դուրս եկել հիվանդասենյակներից եւ դեռեւս վախենում են ներս մտնել: Երկրաշարժից հոսանքազրկվել են քաղաքի թաղամասերը, չէր հաջողվում օգտվել նաեւ հեռախոսակապից: Թեեւ ցնցումն ուժեղ էր, բայց բարեբախտաբար շենքերին ու անհատական տներին բան չի եղել եւ տուժածներ չկան: Կապանում վերջին անգամ նման ուժգնությամբ երկրաշարժ զգացել են 1968թ:
12-ամյա Աննան տանը մենակ էր, երբ զգացել է ցնցումն ու արագ իջել բակ: «Ծնողներս աշխատանքի են, ես էլ տեսա տունը շարժվում ա, կառավաթս ու սեղանը աչքիս առաջ շարժվումա, իսկույն գազը, լույսն անջատել եմ, դուռը փակել իջել բակ», – վախեցած պատմում է Կապանի Գարեգին Նժդեհ փողոցի բնակչուհին: ՀՀ արտակարգ իրավիճակների նախարարության Սյունիքի մարզային փրկարար ծառայությունից Aravot.am- ի ի տեղեկացրեցին, որ երկրաշարժը զգացվել է ամբողջ մարզի տարածքում: Ինչպես հայտնել էինք , օգոստոսի 11-ին, ժամը 16.23-ին գրանցվել է 6.6 մագնիտուդով երկրաշարժ, որի էպիկենտրոնը գտնվում է Իրանի տարածքում` Ահար քաղաքից 16-կմ դեպի հյուսիս-արևմուտք:
Երկրաշարժը գրանցվել է նաև ՀՀ տարածքում. Ագարակ, Մեղրի,Քաջարան, Կապան, Գորիսքաղաքներում` 4-5 բալ ուժգնությամբ,իսկ Երևան քաղաքում` 3-4 բալ: Մեր ունեցած տեղեկություններով` Գորիսում ժամը 17-ի սահմաններում տեղի ուենցած ժայռաբեկորի փլման պատճառը երկրաշարժն է եղել:
Մերի ՍՈՂՈՄՈՆՅԱՆ
