Անդրադառնալով Գյումրու քաղաքապետի ԲՀԿ-ական թեկնածու Սամվել Բալասանյանին սատարելու հարցին՝ Գյումրու ՀԱԿ համակարգող Մուրադ Գրիգորյանը հիշեցնում է, որ Բալասանյանը կառավարության ծրագրին դեմ քվեարկելուց կարճ ժամանակ անց գնաց ՀՀԿ ղեկավար Սերժ Սարգսյանի մոտ՝ քաղաքապետ առաջադրվելու «դաբրո» ստանալու, իսկ դրանից օրեր անց՝ ԲՀԿ-ական փոխմարզպետներն ու փոխնախարարները հրաժարական տվեցին. «Իրենք ճշգրտման խնդիր ունեն, թե իրենք ով են: Երբ որ իրենք կպարզեն, թե իրենք քաղաքական դեմքով ով են, ՀԱԿ Գյումրու գրասենյակը կկողմնորոշվի»: Ստորեւ ներկայացնում ենք որոշ հատվածներ Գյումրու քաղաքապետի ընտրությունների շուրջ Մուրադ Գրիգորյանի եւ «Շիրակ կենտրոն» հ/կ նախագահ Վահան Թումասյանի «Դեմ առ դեմ» բանավեճը:
Մուրադ Գրիգորյան– Գյումրիում իշխանությունը յուրատեսակ մոդել է փորձարկում, որը հաջողացնելու դեպքում կկիրառի փետրվարի նախագահական ընտրությունների ժամանակ՝ ստեղծելով հանրապետականների ու Բարգավաճի մի հիբրիդ: Այսինքն՝ ձեւավորել մի ալյանս, որը գուցե իշխանական ռեժիմի հաշվարկով՝ կապահովի իրենց հաղթանակն առաջիկա նախագահական ընտրություններում:
Վահան Թումասյան- Ես միշտ զարմանում եմ քաղաքական նման ծանր վերլուծությունների վրա՝ հիբրիդ, ալյանս ձեւավորել եւ այլն: Այդ ե՞րբ են Հանրապետականի եւ «Բարգավաճ Հայաստանի» հարաբերություններն այդքան վատ եղել, որ հիմա էլ մտածեն հարաբերություններ հաստատելու մասին: Ընդամենը մի քանի ամիս առաջ խորհրդարանական ընտրությունների ժամանակ կային ընտրատարածքներ, որտեղ Հանրապետական կուսակցությունը, նաեւ ՀՀԿ եւ ՀՀ նախագահը, պաշտպանում էին «Բարգավաճ Հայաստանի» թեկնածուներին: Այսինքն՝ Գյումրիի պարագայում զուտ քաղաքական կողմով իրավիճակը վերլուծելը սխալ կլինի:
Կարդացեք նաև
«Առավոտ»– Պարոն Թումասյան, Դուք ասում եք, որ Ձեզ համար գերխնդիրը Գյումրիի ապաքրեականացումն է, եւ այդ հարցում Ձեր հույսը կապում եք Սամվել Բալասանյանի հետ: Ըստ Ձեզ՝ արդյոք նա ա՞յն թեկնածուն է, որը կարող է ապաքրեականացնել Գյումրին:
Վ. Թումասյան- Նախ՝ այն թեկնածուն, որը կկարողանար իմ պատկերացումները լավագույնս իրագործել՝ ես էի: Սակայն Հայաստանում առկա իրավիճակում առանց իշխանության միջամտության հնարավոր չէ փոփոխություն կատարել որեւէ համայնքում: Եվ ես կարծում եմ, որ մեր բախտը բերեց, որ իշխանություններն ընտրեցին Սամվել Բալասանյանին:
«Առավոտ»- Ձեր խոսքերից ստացվում է, որ Դուք ի սկզբանե համակերպվել եք այն իրողության հետ, որ Սամվել Բալասանյանը իշխանության միջամտությամբ, ասել է՝ ոչ արդար ընտրություններով, գալու է իշխանության, եւ միեւնույն ժամանակ նրանից սպասում եք իշխանության որակի փոփոխություն: Արդյոք իշխանական ռեսուրսներով քաղաքապետ դարձող թեկնածուից որակական փոփոխության Ձեր սպասելիքներն իրատեսակա՞ն են:
Վ. Թումասյան– Իշխանությունները հասկացան, չէ՞, ինչու հենց կանգնեցին Սամվել Բալասանյանի վրա… որպեսզի հասարակության եւ քաղաքի ապագայի համար դրական հետեւանքներ ունենա:
Մ. Գրիգորյան– Բալասանյան Սամվելն այն անձնավորությունը չէ, որ ապաքրեականացնի Գյումրին: Կլիներ այն դեպքում, եթե ընտրության հնարավորությունը թողնվեր գյումրեցիներին: Տարբերությունը որն է, եթե նախորդ ընտրություններին Վարդան Ղուկասյանն ընտրվեց կարմիր բերետավորների, տանկ-հրանոթների միջոցով (ես լսել եմ, այդ տարիներին Գյումրիում չեմ եղել), հիմա նույն բանն արվում է ավելի քաղաքակիրթ, ավելի փափուկ ձեւով՝ Բաղրամյան 26 մուտքուելքով, որը «պատահաբար» թափանցում է մամուլ, եւ դա համարվում է մի խոշոր, ծանրակշիռ, առաջանցիկ քայլ մյուս հավակնորդների համեմատ՝ որ Բալասանյան Սամվելը հանրապետության նախագահի հետ գյուղատնտեսական թեմա է քննարկել: Տարբերությունը ո՞րն է, եթե էդ «դաբրո» կոչվածի մեթոդներն են միայն այլ: Այս ամենի նպատակն այն է, որ ընտրության ինստիտուտը ջարդեն, որ իրենց թաթարախանական բարքերի արդյունքում աղքատ, ընչազուրկ գյումրեցին այլեւս հույս չկապի ընտրությունների հետ. Բաղրամյան փողոցից արդեն ի վերուստ որոշված թեկնածուն կա, եւ արդեն ընտրությունը դառնալու է զուտ միջոցառում՝ քվեարկության պրոցես:
«Առավոտ»– Իսկ ինչո՞ւ ՀԱԿ-ը քաղաքապետի թեկնածու չառաջադրեց:
Մ. Գրիգորյան– Իսկ ո՞վ է ասել, եթե ոչ ՀԱԿ-ից, ապա ձեր թվարկած անուն-ազգանուններից ավելի արժեքավոր, օգտակար թեկնածուներ կան կամ կլինեն:
Վ. Թումասյան– Մուրադ ջան, եթե պարզ խոսելու լինենք, կա՞ որեւէ երկիր, որտեղ հանրապետության ղեկավարը երկրի երկրորդ քաղաքի ղեկավարի ընտրությամբ մտահոգ չլինի: Ինչ վերաբերում է 3, 5 կամ 7 տոկոս հավաքած քաղաքական ուժերին, ապա նրանք անշուշտ կարող են մասնակցել օլիմպիական սկզբունքով՝ եթե ուզում են քաղաքական դիվիդենդներ հավաքել կամ քաղաքական ապագա առաջնորդներ պատրաստել:
Մ. Գրիգորյան– Քաղաքական գործիչը թրծվում է պայքարում՝ ոստիկանական ուժերի, ռեժիմի դեմ, հրապարակներում, նաեւ՝ բանտերում, որից, բացի ՀԱԿ-ից, մնացած ուժերը՝ իմ զրուցակից ընկերը նույնպես, բավականաչափ հեռու են: Կադրերը չեն թրծվում կաբինետներում՝ պոպուլիստական օրենքներ գրելով, դատարկաբանությամբ զբաղվելով եւ ընտրակաշառքի մոդելները կատարելագործելով: Մենք քաղաքապետի թեկնածու չենք առաջադրել քաղաքական հաշվարկից ելնելով: Մեր գերխնդիրը նախագահական ընտրություններին առավելագույնս պատրաստվելն է:
Վ. Թումասյան– Երբ որ ես մարտի 1-ին միտինգ էի ղեկավարում, նույն ՀԱԿ-ի տղաները ծառերի տակ պահ էին մտնում, բայց դրա մասին չէ խոսքը:
Մ. Գրիգորյան– Դուք միտինգ չեք ղեկավարել, ՀԱԿ-ի տղաները պահ չեն մտել: Կգաս, Գյումրիում գոնե մեկ պահ մտածի՝ անուն կասես ու նրանից պատասխանը կստանաս: Գյումրի քաղաքում քո բոլոր գովերգած ու չգովերգած թեկնածուներին հավաքես, հանրագումարի բերես, մի երկու անգամ էլ բազմապատկես՝ Կոնգրեսի միջին…
Վ. Թումասյան– Մուրադ ջան, ես սխալվել եմ, ես չգիտեի, որ դուք այդքան գաղտնի կադրեր ունեք, որ ԱԺ անցած ընտրություններին 4 ընտրատարածքից 3-ում դուք եք հաղթել, եւ հիմա քաղաքապետի 5 թեկնածու ունեք, որ պետք է առաջադրվեն վերջին օրը: Ես նոր հասկացա, որ Կոնգրեսը գաղտնի զենքեր ունի, եւ ես սխալվել եմ, որ Գյումրիում գործող ընդդիմադիր կուսակցությունները ոչ թե պարապ-սարապ նարդի են խաղում, այլ հսկա բանաձեւեր են գրում եւ կադրեր պատրաստում, որոնք առաջիկա ՏԻՄ ընտրություններում շռնդալից հաղթանակ են տանելու: Ես կփոխեմ իմ վերաբերմունքը առաջադրվող թեկնածուների վերաբերյալ եւ կպաշտպանեմ ձեր թեկնածուին:
Մ. Գրիգորյան– Մենք քաղաքապետի թեկնածու չունենք, եւ իրոնիադ ավելի շատ ճոռոմաբանություն է հիշեցնում: Կոչ կանեմ ավելի կոռեկտ լինել:
Բանավեճը վարեց ԱՐԵՎԻԿ ՍԱՀԱԿՅԱՆԸ
Նախագիծն իրականացվում է «Բաց հասարակության հիմնադրամներ-Հայաստան» ծրագրի շրջանակներում:
Գյումրու քաղաքապետի ընտրությունների շուրջ Մուրադ Գրիգորյանի եւ «Շիրակ կենտրոն» հ/կ նախագահ Վահան Թումասյանի «Դեմ առ դեմ» բանավեճն ամբողջությամբ
