Վերլուծաբանների համաձայն, Քլինթընի աշխատանքային այցն արտացոլում է Միացյալ Նահանգների համար Աֆրիկայի ռազմավարական նշանակության բարձրացումը
ԱՄՆ-ի արտաքին գործերի նախարար Հիլարի Քլինթընն ուրբաթ օրն ավարտել է Աֆրիկայի պետություններում 11-օրյա իր շրջագայությունը:
Աշխատանքային այս այցի շրջանակներում, որը, հնարավոր է, այս տարածաշրջան կատարված իր վերջին այցն էր Միացյալ Նահանգների արտաքին գերատեսչության ղեկավարի պաշտոնում, արտգործնախարարն այցելել է աֆրիկյան ինը պետություն՝ Սենեգալ, Ուգանդա, Հարավային Սուդան, Քենիա, Մալավի, ՀԱՀ, Նիգերիա, Գանա և Բենին:
Այցելությունների ընթացքում Քլինթընը նշում էր կատարել ինչպես աֆրիկյան պետությունների կողմից ունեցած հաջողությունները, այնպես էլ անվտանգության, տնտեսական համագործակցության և զարգացման ոլորտում դեռևս առկա խնդիրների մասին, որոնցից են կանանց իրավունքների ոլորտում տիրող անբավարար իրավիճակն ու ՄԻԱՎ/ՁԻԱՀ-ի դեմ պայքարը:
Կարդացեք նաև
Բացի այդ, այցելած բոլոր պետություններում Քլինթընը հաստատել է, որ դրանք կարող էն շարունակել ապավինել Միացյալ Նահանգների աջակցությանը:
ԱՄՆ-ի արտաքին գերատեսչության ղեկավարը հորդորել է Աֆրիկայի պետություններին, մասնավորապես ՀԱՀ-ին, զբաղեցնել իրենց տեղը միջազգային ասպարեզում և առավել համարձակ մասնակցություն ունենալ մարդու իրավունքներին և ժողովրդավարության խնդիրներին վերաբերող միջազգային հարցերում:
Վերլուծաբանների համաձայն, Քլինթընի աշխատանքային այցն արտացոլում է Միացյալ Նահանգների համար Աֆրիկայի ռազմավարական նշանակության բարձրացումը: Աֆրիկան, ըստ վերլուծաբանների, առավել կարևոր է դառնում ոչ միայն ահաբեկչության դեմ պայքարի առումով, այլև էներգետիկայի ոլորտում, որտեղ մայրցամաքի պետությունները, մասնավորապես Գվինեյան ծոցի տարածաշրջանը, նավթի հորատման ոլորտում Պարսից ծոցի նավթարդյունաբերող պետությունների համար լուրջ մրցակից է համարվում:
Չնայած այցի ընթացքում Քլինթընը նշում չի կատարել Չինաստանի մասին, վերլուծաբաններից շատերը նշել են, որ այս շրջագայությունը հիմնականում նպատակ է հետապնդել հակազդելու մայրցամաքում Չինաստանի կողմից զբաղեցրած տնտեսական գերիշխող դիրքին:
Քլինթընը կողմ է հանդես եկել աֆրիկյան պետությունների և Միացյալ Նահանգների միջև առևտրային հարաբերությունների ամրապնդմանը, որի արդյունքում, նրա խոսքերով, նման հարաբերությունների բոլոր մասնակիցները կկարողանան ավելացնել աշխատատեղերի թիվն ու տնտեսական աճ գրանցել:
Այցի ընթացքում Միացյալ Նահանգների արտգործնախարարը հաճախ կրկնել է նախագահ Բարաք Օբամայի կողմից Գանա 2009 թվականին կատարած այցի ընթացքում արված հայտարարությունը. «Աֆրիկային անհրաժեշտ է գործընկերություն, այլ ոչ թե հովանավորություն, ամուր ինստիտուտներ, այլ ոչ թե ուժային կառույցներ»:
Արմեն Հովհաննիսյան
«Ամերիկայի Ձայն»
