Ֆլորիդայից ընտրված հանրապետական կոնգրեսական Գաս Բիլիրակիսը կոչ է անում պաշտոնական Վաշինգտոնին արտաքին քաղաքական առաջնահերթություն դարձնել Սիրիայում բնակվող քրիստոնյաների` այդ թվում հայերի պաշտպանությունը: Այս նպատակով Ներկայացուցիչների տան անդամը հատուկ բանաձեւ է մշակել, որը Կապիտոլիումում շրջանառության մեջ կդրվի հաջորդ ամիս:
«Կարծում եմ, որ այստեղ` Միացյալ Նահանգներում, մենք պարտավորություն ունենք, եւ ես շարունակում եմ խոսել Մերձավոր Արեւելքի քրիստոնյաների, ինչու չէ` բոլոր կրոնական փոքրամասնությունների անունից: Կարծում եմ, որ ապագայում այս հարցը պետք է նախապայման դառնա սիրիական կառավարության առջեւ, որպեսզի այն ամբողջության կատարի իր պարտավորությունները` պաշտպանելով կրոնական փոքրամասնությունների իրավունքները: Մենք գիտենք, որ Ասադն ի վերջո հեռանալու է, նրա վարչակազմը կոռումպացված է, աջակցում է ահաբեկիչներին` մասնավորաբար «Հըզբոլա» շարժմանը: Բայց ինչ կառավարություն էլ զբաղեցնի նրա տեղը` մենք պետք է համոզված լինենք, որ Սահմանադրության մեջ ընդգրկվելու են կրոնի, խոսքի եւ արտահայտվելու ազատությունները երաշխավորող դրույթները», – նշել է հանրապետական կոնգրեսականը «Ազատություն» ռադիոկայանի վաշինգտոնյան գրասենյակին տված հարցազրույցում:
Բիլիրակիսը նաեւ պնդում է, որ Միացյալ Նահանգները պետք է լրջորեն զբաղվի սիրիահայերի առջեւ ծառացած խնդիրներով:
«Ես միշտ ակտիվորեն աջակցել եմ հայերին, եղել եմ Ներկայացուցիչների պալատում շրջանառության մեջ դրված այն բանաձեւի համահեղինակներից մեկը, որում հստակ նշվում էր, որ Ցեղասպանություն եղել է: Ես ինքս հունական ծագում ունեմ եւ շատ լավ տեղյակ եմ, թե այդ հրաշալի մարդիկ ինչպիսի դժվարությունների միջով են անցել: Ես ցանկանում եմ պաշտպանել կրոնական բոլոր փոքրամասնություններին: Որպես Ներկայացուցիչների պալատի անդամ` դա իմ պարտականությունն է», – նշում է Բիլիրակիսը:
Ինչ վերաբերում է բուն բանաձեւին, ապա հանրապետական կոնգրեսականը հույս ունի, որ այն կընդունվի ոչ միայն Ներկայացուցիչների պալատում. – «Մենք աշխատելու ենք նաեւ Սենատի անդամների հետ: Այստեղ բարեկամներ ունենք, որոնք եւս մտահոգված են խնդրով: Այնպես որ, մենք կցանկանայինք, որ բանաձեւին միանար նաեւ Սենատը: Փաստաթուղթը շրջանառության մեջ կդրվի սեպտեմբերին, ու թեեւ այն պարտադիր ուժ չունի, բայցեւայնպես հստակ ուղերձ է իրենից ներկայացնում, եւ մենք ցանկանում ենք վստահ լինել, որ Պետքարտուղարությունն ամեն ինչ անում է կրոնական ազատությունները պաշտպանելու ուղղությամբ»:
Կոնգրեսականի խոսքով` Միացյալ Նահանգները պետք է նաեւ հստակ ճնշում գործադրի ոչ միայն սիրիացի քրիստոնյաների իրավունքների պաշտպանության, այլեւ կրոնական այդ խմբի դերակատարությունը բարձրացնելու համար:
«Մենք կուզեինք վստահ լինել, որ [սիրիական ընդդիմության] Ազգային խորհրդում ներկայացված կլինեն քրիստոնյաները, ինչպես նաեւ կրոնական մյուս բոլոր փոքրամասնությունների ներկայացուցիչները: Դա պետք է մեր առաջնահերթությունը դառնա», – նշում է Բիլիրակիսը` կոչ անելով հարկ եղած դեպքում նաեւ հստակ տնտեսական պատժամիջոցներ կիրառել: Հանրապետական կոնգրեսականի խոսքով` Մերձավոր Արեւելքի քրիստոնյաների պաշտպանության գործում այդ մեթոդն արդեն իսկ կիրառվել է:
«Ես եւ Կոնգրեսի մի շարք այլ անդամներ սահմանափակումներ նախաձեռնեցինք Եգիպտոսին հատկացվող ամերիկյան ֆինանսական օգնության հարցում: Դուք գիտեք, որ Եգիպտոսը տարեկան 1 միլիարդ 600 միլիոն դոլարի ամերիկյան օգնություն է ստանում: Այնպես որ, պետք է լինեն նաեւ սահմանափակումներ», – նշում է Ներկայացուցիչների պալատի անդամ, Ֆլորիդայից ընտրված հանրապետական Գաս Բիլիրակիսը:
