Թեղուտի հիմնախնդիրներին վերաբերող աշխարհահռչակ երգիչ Սերժ Թանկյանի մտահոգություններին արձագանքելու Լոռու մարզպետի քայլը քաղաքացիական նախաձեռնության ակտիվիստ Ռուզան Գրիգորյանին պատվիրված հայտարարության տպավորություն է թողել:
«Նրա անձնական խոսքերը չեն, նրան ստիպել են պաշտպանել բիզնես շահերը, մասնավորապես «Վալլեքս» խմբի տիրոջ շահերը»,- Aravot.am-ին ասաց ակտիվիստը: Ըստ նրա, Թանկյանը անձամբ է այցելել Լոռու մարզ ու Թեղուտ եւ խնդրին լավ ծանոթ է.«Ինչ որ Սերժն ասում է, իսկապես , հիմնավորված կան այդ խնդիրները Թեղուտում: Այսքան ժամանակ փորձել ենք աշխատել մտավորականների հետ, որ իրենք էլ իրենց հերթին ճնշում գործադրեն, բարձրաձայնեն այդ հարցը, բայց իշխանություններին, կառավարությանը ինչ-ինչ ձեւով հաջողվել է այդ մարդկանց գնել, վախեցնել կամ ստիպել… Թանկյանի դեպքում ունենք անկախ, ազատ ոչնչից կախում չունեցող քաղաքացի, որ կարող է հանգիստ կանգնել ու ասել՝ ժողովուրդ խնդիր ունենք»:
Ըստ Ռ. Գրիգորյանի, Լոռու մարզպետը, արձագանքելով Ս. Թանկյանի մտահոգություններին , իրեն դրեց ծիծաղելի իրավիճակում, իսկ ինչ վերաբերում է Թեղուտի գյուղապետի ասածներին, թե Թանկյանը երբեւէ չի եղել Թեղուտում ու Թեղուտի մասին նրան սխալ ինֆորմացիա են տվել, ասաց. «Թանկյանը Թեղուտում եղել է, բայց եթե ինքն էլ չի հավատում, կարող է Լոռու մարզպետի պես առաջարկ անել, որ գա իր հետ հանդիպի ու քննարկի այդ ծրագիրը: Դա ինձ համար ծիծաղելի առաջարկ է: Նա համակարգային լուրջ խնդիր է բարձրացնում, որ Հայաստանում հանքարդյունաբերությունը դարձել է տնտեսական զարգացման առաջնահերթ ճյուղ … ինչո՞ւ , ո՞ւր եք մեզ տանում, փորձո՞ւմ եք երկիրը վերածել հանքակցորդ երկրի, մի երկիր , որտեղից մեր ազգային հարստությունը պետք է արտահանվի եւ դրա դիմաց շատ քիչ վճարումներ կատարվի՞ պետական գանձարան»:
Ռ. Գրիգորյանն ասաց, որ Թանկյանը իր սկզբունքներով մեծ բնապահպան է ու անձամբ էր իրենց ասել՝ դիմեք ինձ, ինչ հարցով կարող եմ կօգնեմ:
Կարդացեք նաև
Արփինե ՍԻՄՈՆՅԱՆ
