Հայկական ծանրամարտում արժանի ներդրում ունեցած մարզիկին հորդորում է Հայաստանի ծանրամարտի ֆեդերացիայի նախագահ Սամվել Խաչատրյանը:
«Արա Խաչատրյանը մեր անվանի ծանրորդներից է: Նա Հայաստանի օլիմպիական հավաքական ընդգրկվել է հարուստ մրցափորձի եւ Հայաստանի գավաթի առաջնությունում, որը վարկանիշային բնույթ ուներ, 170+205=375 կիլոգրամ արդյունք ցույց տալու շնորհիվ: Սակայն Արան Լոնդոնում իրեն բացարձակապես չարդարացրեց: Նա ձեռքի ու ոտքի վնասվածքներ ունի, երեք անգամ վիրահատվել է ու չի հասցնում լիարժեք ապաքինվել եւ պաշտոնական մրցումներին մասնակցել առանց խնդիրների: Լոնդոնում էլ նա պոկում վարժությունում ցավեցրեց վնասված ձեռքը: Այս ամենից ելնելով՝ ես նրան խորհուրդ կտամ՝ արդեն մտածել մեկ ուրիշ գործով զբաղվելու մասին: Սրտի ցավով եմ ասում, բայց խիղճս տանջում է», – Aravot. am-ի հետ զրույցում ասաց Սամվել Խաչատրյանը:
Հարցին, թե նա որպես կանոն պաշտոնական մրցումներում հիմնականում բավարարվել է երկրորդ մրցանակային տեղերով ու գոնե Եվրոպայի չեմպիոն դառնալու ցանկության դեպքում հավաքական ընդգրկվելու հնարավորություն չի՞ ունենա, Սամվել Խաչատրյանը պատասխանեց. «Եթե Արան այդպիսի նպատակ ունի, ոչ ոք նրան արգելք չի հանդիսանա: Բայց դրա համար պետք է մարզվի, մասնակցի Հայաստանի առաջնություններին, բարձրացնի անհրաժեշտ կիլոգրամներ ու նպատակին հասնի: Դրա համար բոլորս էլ սրտանց ուրախ կլինենք»:
Աշոտ ՀԱԿՈԲՅԱՆ
