Մասիս քաղաքն իր հարակից գյուղերով աստիճանաբար խոլերայի «բույն» է դառնում. ամեն օր Երեւանից տոննաներով աղբ են տեղափոխում Մասիսից ընդամենը 5 կիլոմետր հեռավորության վրա գտնվող աղբանոց, որին շատ մոտ են գտնվում նաեւ մի քանի գյուղեր: Այս տարածքում, ինչպես «Առավոտի» հետ զրույցում ասացին մասիսցիները, հակահիգենիկ իրավիճակ է ստեղծվում, բացի այդ, աղբը պարբերաբար այրում են, ինչի հետեւանքով թունավոր նյութեր են արտանետվում շրջակա միջավայր:
Մասիսի բնակիչ Անի Գաբրիելյանի պատմելով՝ «Օրեր առաջ էլ, մոտակա գյուղից ուշ երեկոյան տուն էի վերադառնում: Աղբանոցից բարձրացող ծուխը փակել էր ճանապարհը, ոչինչ չէր երեւոմ, ոնց որ մառախուղ, բայց այս դեպքում՝ աղբից: Իսկ շրջապատով մեկ տարածված գարշահոտությունն անտանելի էր: Այդ աղբանոցի գարշահոտության ու աղբն այրելու պատճառով մեր բնակիչների մոտ տարբեր խրոնիկ հիվանդություններ են սրվում. անհնար է շնչել»:
Աղբանոց մեր այցելության ժամանակ էլ աղբահավաք մի քանի մեքենաներ աղբ էին դատարկում եւ աղբի մի հատված էլ այրվում էր, ու ծուխը տարածվել էր շրջապատով մեկ: Աղբանոցի աշխատակիցները մեզ հետ զրույցում վստահեցրին, որ իրենք աղբը չեն այրում, այլ՝ «Ինքն իրեն է վառվում. մեկը գալիս է ծխախոտը գցում է կամ կրակայրիչն է օգտագործվում, վառվում է»:
Կարդացեք նաև
Աղբանոցի տարածքը Մասիսի քաղաքապետարանը 99 տարով տվել է վարձակալության, որի դիմաց ստանում է ընդամենը 58 հազար 800 դրամ: Մասիսի փոխքաղաքապետ Կարապետ Օհանյանը մեզ հետ զրույցում վստահեցրեց, որ աղբանոցի համար հողհատկացումը տրվել է միայն Մասիս քաղաքը սպասարկելու համար: Իսկ հարցին, արդյոք չի՞ մտահոգում այն փաստը, որ Մասիս քաղաքի եւ հարակից գյուղերի մթնոլորտն աղտոտվում է, ինչն էլ վնասում է բնակիչների առողջությունը, փոխքաղաքապետն ասաց.«Մտահոգում է, բայց ի՞նչ անենք, ամեն ինչ օրինական է»: Իսկ թե ինչո՞ւ են Երեւանի աղբն այդ աղբանոց տեղափոխում, պարոն Օհանյանն ասաց, որ վարձակալման պայմանագրով արգելված չէ աղբը Երեւանից կամ մեկ այլ վայրից բերելը:
Աղբանոցն այնքան է իր սահմաններից դուրս եկել, որ լցվում է կողքով հոսող Սեւ Ջուր գետը, որն էլ, ինչպես նկատեցինք, վերածվել էր հոսող աղբանոցի:
Մասիսի շուրջ 250 քաղաքացիներ դիմում-բողոք են ներկայացրել Մասիսի քաղաքապետին եւ իրենց տարածքի պատգամավորին, սակայն մինչ օրս խնդիրը չի լուծվել: Համապատասխան գերատեսչություններում խնդիրը բարձրացնելու համար բնակիչները դիմել են նաեւ «Ժառանգություն» կուսակցությանը:
Իսկ Մասիսի քաղաքապետ Դմիտրի Նազարյանն էլ ասաց, որ ժամանակին ահազանգեր եղել են, հանձնաժողով է ստեղծվել, որը աղբանոցի շահագործողին պարտավորեցրել է դադարեցնել հրկիզումները:
Մեր ձեռքի տակ է նաեւ պայմանագիրը, որի ուշագրավ կետերից մեկով վարձակալը պարտավոր է` «Հողն օգտագործել արդյունավետ, կիրառել արտադրության բնապահպանական տեխնոլոգիաները, չնվազեցնել հողի բերրիությունը, ապահովել բերքի հակահրդեհային անվտանգությունը, տնտեսական գործունեության հետեւանքով թույլ չտալ բնապահպանական իրադրության վատթարացում, հողօգտագործման կանոնների խախտում»:
Արմինե ՀՈՎՀԱՆՆԻՍՅԱՆ
