Լոնդոնի օլիմպիական խաղերում 69 կգ ծանրորդ Առաքել Միրզոյանը, որը միանգամայն հավակնում էր մեդալի, հրում վարժությունում զրո ստացավ: Այս տհաճ անակնկալի մեկնաբանությունը չունի նաեւ Հայաստանի ծանրամարտի ֆեդերացիայի նախագահ Սամվել Խաչատրյանը:
«Aravot.am»- հետ բացառիկ հարցազրույցում նա ասաց. «Առաքելը այս անգամ քաշ գցելու հետ կապված խնդիրներ չի ունեցել: Այսինքն, ինչպես սպորտում ընդունված է ասել, քաշը նորմալ գցել է` ուտելով: Նա արդեն 69 կգ քաշում, իմ աչքի առջեւ մարզումների ժամանակ միմյանց հետեւից մեկական անգամ մոտեցումներով պոկել է 150 կիլոգրամը, հրել 180-ը: Իսկ արդեն Լոնդոնում Հոկսեն Միրզոյանի պատմելով, վերջին մի քանի օրերին ինչ որ անբացատրելի բաներ են կատարվել մարզիկի հետ: Հոր` մարզչի, խոսքերով Առաքելը վերջին օրերին ասել է, թե չի զգում ոչ ծանրաձողի քաշը, ոչ էլ իրեն: Մրցման ժամանակ նրա պատվիրած մեկնարկային 148 կիլոգրամը երկու կգ-ով ցածր էր մարզումային քաշերից, իսկ հրումում երկու անգամ 177 կգ ձախողելուն եւ երրորդում 181-ն էլ չբարձրացնելուն մինչեւ հիմա բացատրություն չեմ կարողանում գտնել: Չէ՞ որ դրանք նրա ուժերի սահմաններում էին»:
Աշոտ ՀԱԿՈԲՅԱՆ
