Հայաստանում ինչպիսի՞ հարկման քաղաքականության են ենթակա այն ֆիզիկական անձինք՝ ովքեր վաճառում կամ օտարում են իրենց սեփականությունը հանդիսացող հասարակական նշանակության տարածքները: «Փաստինֆո» լրատվական գործակալության թղթակցի այս հարցին ՀՀ ՊԵԿ տեղեկատվության և հասարակայնության հետ կապերի բաժինը պատասխանել է, որ համաձայն «Ավելացված արժեքի հարկի մասին» ՀՀ օրենքի 6-րդ հոդվածի 1-ին կետի, «ԱԱՀ-ով հարկվող գործարք է համարվում` ֆիզիկական անձանց պատկանող` ձեռնարկատիրական գործունեության առարկա հանդիսացող գույքի, արտադրական, այլ առևտրային և հասարակական նշանակության գույքի, ներառյալ` շենքերի, շինությունների (այդ թվում` անավարտ (կիսակառույց), արդյունաբերության, ընդերքoգտագործման և այլ արտադրական նշանակության հողերի (այդ թվում` ընդհանուր սեփականություն հանդիսացող գույքի և հողերի) օտարումը»:
Պատասխանում միաժամանակ նշվում է, որ նույն օրենքի 3-րդ հոդվածի համաձայն՝ «անձինք, որոնց կողմից նախորդ օրացուցային տարում իրականացված` սույն օրենքի 6-րդ հոդվածի 1-ին կետով սահմանված գործարքների հարկվող շրջանառությունը չի գերազանցել 58,35 միլիոն դրամը, տվյալ օրացուցային տարում ԱԱՀ վճարող են համարվում այդ գործարքների հարկվող շրջանառությունը 58,35 միլիոն դրամը գերազանցելու պահից` 58,35 միլիոն դրամը (ԱԱՀ-ի շեմը) գերազանցող մասի համար»:
«Փաստինֆո» գործակալություն
